Լոռու մարզի բնակիչը կալանավորվել է՝ ոստիկանի նկատմամբ բռնություն գործադրելու մեղադրանքով

ՀՀ քննչական կոմիտեի Լոռու մարզային քննչական վարչության Թումանյանի քննչական բաժնում քննվող քրեական գործի շրջանակներում իրականացված քննչական և դատավարական այլ գործողությունների արդյունքում պարզվել են Լոռու մարզի բնակչի կողմից ոստիկանի նկատմամբ բռնություն գործադրելու դեպքի հանգամանքները:

Այս մասին հայտնում են ՀՀ քննչական կոմիտեից:

Քննությամբ ձեռք բերված փաստական տվյալների համաձայն՝ 2022 թվականի ապրիլի 26-ին՝ ժամը 13:15-ի սահմաններում, Լոռու մարզի Ախթալա համայնքի Նեղոց բնակավայրի 39-ամյա բնակիչն Ալավերդի-Բագրատաշեն ավտոճանապարհին առանց առջևի պետհամարանիշի վարել է «Լադա» մակնիշի ավտոմեքենան, ինչը նկատվել է նույն տարածքում ծառայություն իրականացնող՝ ՀՀ ոստիկանության պարեկային ծառայության աշխատակիցների կողմից:

39-ամյա տղամարդը, չենթարկվելով կանգ առնելու՝ ոստիկանության ծառայողների կողմից ներկայացված օրինական պահանջին, դիմել է փախուստի և ավտոմեքենան կայանել հիշյալ բնակավայրի տներից մեկի բակում։ Այնուհետև անտեսելով ոստիկանների՝ համապատասխան փաստաթղթեր ներկայացնելու օրինական պահանջը՝ 39-ամյա տղամարդը հարվածել է նրանցից մեկի դեմքին:

Ձեռք բերված բավարար ապացույցների համակցությամբ՝ Նեղոց բնակավայրի 39-ամյա բնակչին մեղադրանք է առաջադրվել՝ ՀՀ քրեական օրենսգրքի 316-րդ հոդվածի 1-ին մասով (իշխանության ներկայացուցչի նկատմամբ բռնություն գործադրելը): Վերջինս կալանավորվել է:

Նախաքննությունը շարունակվում է: