Հայաստանի պատանի և երիտասարդ ձյուդոյիստները մարզվում են Վրաստանում

Հայաստանի ձյուդոյի պատանեկան և երիտասարդական հավաքականներն ավագ մարզիչներ Գոռ Հարությունյանի և Դավիթ Խաչատրյանի գլխավորությամբ հունիսի 17-ից ուսումնամարզական հավաք են անցկացնում Վրաստանի Գորի քաղաքում։

Ինչպես տեղեկացնում է Հայաստանի ձյուդոյի ֆեդերացիայի մամուլի ծառայությունը, հավաքին մասնակցում են նաև Վրաստանի և Ղազախստանի այդ տարիքային հավաքականները: Մեր պատանիները նախապատրաստվում են Ռումինիայի Բուխարեստ քաղաքում կայանալիք Եվրոպայի գավաթի մրցաշարին, իսկ երիտասարդները՝ Չեխիայի Պրահա քաղաքում կայանալիք նմանատիպ մրցաշարին։

Հավաքականները Հայաստան կվերադառնան հունիսի 29-ին: Հուլիսի 6-16-ը դրանք ուսումնամարզական հավաք կանցկացնեն նաև Երևանի Օլիմպավան մարզահամալիրում, որից հետո կմեկնեն Ռումինիա և Չեխիա` մասնակցելու Եվրոպայի գավաթի մրցումներին։