Աննա Գրիգորյանը միանում է «Վերածնվող Հայաստան»-ին. (տեսանյութ)

«Իմ քայլը»-ից դուրս եկած, անկախ պատգամավոր Աննա Գրիգորյանն այսօր լրագրողների հետ զրույցում հայտնեց, որ միանում է «Վերածնվող Հայաստան» կուսակցությանը և պատրաստվում է մասնակցել արտահերթ ընտրություններին: 

««Վերածնվող Հայաստան» կուսակցությունը ստեղծվել է իր հիմքում ունենալով Սյունիքը։ Այն հետպատերազմյան Հայաստանում ստեղծված կուսակցություն է, և կարծում եմ ստեղծվել է անհրաժետաբար, որովհետև գործող իշխանությունը համապատասխան ջանքեր և արդյունավետ քայլեր չի ձեռնարկել և մեծ հաշվով անտարբերության է մատնել Սյունիքը և այդ կուսակցությունը ստեղծվել է հենց Սյունիքում, կորիզն էլ Սյունիքի համայնքապետերեն են»,-նշեց պատգամավորը: 

Գրիգորյանը հավաստիացրեց, որ չնայած կուսակցությունը ստեղծվել է Սյունիքում, բայց ամրանալու է Հայաստանի բոլոր մարզերում և Երևանում: 

Դիտարկմանը, որ  «Վերածնվող Հայաստան»-ը ընտրությունների ժամանակ դաշինքով է հանդես գալու Ռոբերտ Քոչարյանի հետ և Աննա Գրիգորյանը կլինի ցուցակում 3-րդ կինը, պատգամավորը ոչ հերքեց, ոչ հաստատեց, նշելով, որ դեռ վաղ է այդ մասին խոսել: 

Հարցին, արդյոք խոչընդոտ չէ այն հանգամանքը, որ Գրիգորյանը 2.5 տարի եղել է ՔՊ անդամ, առաջադրվել այդ կուսակցությունով, ներկայացրել հեղափոխությունն ու մերժել նախկիններին, այժմ հնարավոր համագործակցության է գնում Ռոբերտ Քոչարյանի հետ, պատգամավորը պատասխանեց.

«Երբ վերջնական որոշում լինի, ինձ կարող եք տալ բոլոր հարցերը, բայց ինձ համար անընդունելի են բոլոր բաժանումները»: