Ուժգին պայթյուն Սիրիայի շուկայում. կան զոհեր և տուժածներ

Առնվազն յոթ մարդ է զոհվել Սիրիայի հյուսիսային Աազազ քաղաքի կենտրոնական շուկայում տեղի ունեցած պայթյունի հետևանքով, նրանց թվում կա 2 երեխա:

Նախնական տեղեկությունների համաձայն՝ ականապատ ավտոմեքենա է պայթել, կան նաև բազմաթիվ վիրավորներ: Այս մասին հայտնում է Reuters  գործակալությունը՝ վկայակոչելով փրկարարներին։

Սոցցանցերում հայտնվել են կադրեր, որոնցում պատկերված են գետնին ընկած մարմինները, վնասված շենքերը և այրվող մեքենայի շրջանակը։ Ըստ սկզբնական տեղեկատվության՝ կա ավելի քան 30 վիրավոր:

Դեռևս պարզ չէ, թե ով է կանգնած Թուրքիայի սահմանից յոթ կիլոմետր հեռավորության վրա գտնվող փոքրիկ քաղաքում տեղի ունեցած այս պայթյունի հետևում:

Պայթյունի պահին շուկան լեփ-լեցուն է եղել մարդկանցով, որոնք գնումներ են կատարել Իդ ալ-Ֆիտր տոնին ընդառաջ, որը նշում է Իսլամական ծոմապահության՝ Ռամադան ամսվա ավարտը:

Սպիտակ սաղավարտներ կամավորական կազմակերպության փրկարարները հայտնել են, որ զոհվածների թվում երկու երեխա կա։

Աազազ քաղաքը վերահսկվում է թուրքամետ զինյալների կողմից, որոնք կռվում են Սիրիայի նախագահ Բաշար ալ Ասադի դեմ։

Թուրքական զորքերը և նրանց աջակցող ուժերը վերահսկում են Սիրիայի ընդարձակ տարածքները թուրքական սահմանի մոտ։
Աազազը սիրիական ազատ բանակի հենակետն է,  քաղաքում գտնվում է Սիրիայի ժամանակավոր կառավարության շտաբը՝ ընդդիմադիր խմբավորում, որը հավակնում է լինել երկրի օրինական իշխանությունը:

Վերլուծաբանները քաղաքը բնութագրում են որպես ռազմավարական նշանակություն քաղաքացիական պատերազմի համատեքստում՝ թուրքական սահմանին մոտ լինելու պատճառով։ Դրանով են անցնում մատակարարման կարևոր ուղիներ։

Սիրիայի հյուսիս-արևմտյան սահմանային շրջանում, ներառյալ Աազազում, հազվադեպ չեն ռումբերի պայթյունները, որոնք ուղղված են խիտ բնակեցված քաղաքացիական տարածքներին:

2016 թվականի նոյեմբերին Աազազում ապստամբների շտաբի մոտ ականապատ մեքենայի պայթյունի հետևանքով զոհվել էր 25 մարդ: Հոկտեմբերին ապստամբների անցակետի վրա նմանատիպ հարձակման հետևանքով զոհվել է նաև 17 մարդ:

2017 թվականին Աազազում ավելի քան 40 մարդ է զոհվել, երբ ականապատ մեքենան պայթել է քաղաքային դատարանի շենքի մոտ։

Հարձակման պատասխանատվությունը ստանձնել է «Իսլամական պետություն» խմբավորումը, որը գրավել է քաղաքը 2013 թվականին և որոշ ժամանակ պահել: