Սպիտակ տան ամենատեսանելի հատվածից ԱՄՆ նախկին նախագահներ Բիլ Քլինթոնի և Ջորջ Բուշ-կրտսերի դիմանկարները հեռացվել են. CNN
ԱՄՆ նախկին նախագահներ Բիլ Քլինթոնի և Ջորջ Բուշ-կրտսերի պաշտոնական դիմանկարները Սպիտակ տան ամենատեսանելի վայրից՝ նախասրահից նախորդ շաբաթ հեռացվել են, իսկ դրանց տեղում փակցվել են ԱՄՆ երկու հանրապետական նախագահների դիմանկարներ, որոնք Միացյալ Նահանգները կառավարել են ավելի քան 100 տարի առաջ:
CNN-ի փոխանցմամբ՝ խնդիրն այն է, որ ըստ Սպիտակ տան ավանդույթի՝ ԱՄՆ վերջին նախագահների պաշտոնական դիմանկարները նախագահի նստավայր մուտք գործելիս ամենատեսանելի և պաշտոնական միջոցառումներին ներկա հյուրերի աչքին զարնող հատվածում պետք է կախված լինեն: Այնինչ Քլինթոնի և Բուշ-կրտսերի դիմանկարները հանվել են և տեղափոխվել Ընտանեկան հին ճաշասենյակ, որը փոքր սենյակ է, հազվադեպ է օգտագործվում և քչերին է տեսանելի:
Նրանց դիմանկարների տեղում այժմ տեղադրված են ԱՄՆ 25-րդ նախագահ Ուիլյամ Մաք-Քինլի-կրտսերի և նրա հաջորդի՝ Թեոդոր Ռուզվելտի դիմանկարները:
ԱՄՆ նախագահի՝ ազգային անվտանգության հարցերով նախկին խորհրդական Ջոն Բոլթոնն իր հեղինակած գրքում նշել է, որ Թրամփը արհամարհում է Ջորջ Բուշ-ավագին և նրա որդի Բուշ-կրտսերին: Որոշ տեղեկությունների համաձայն՝ ԱՄՆ գործող նախագահը քննադատել է նաև Բիլ Քլինթոնին՝ ասելով, որ նա վատ նախագահ է եղել:
Կարծիքներ