Զինվորականները Մեքսիկայի ափերի մոտ 1,6 տոննա կոկաին են առգրավել

Մեքսիկացի զինվորականները Խաղաղ օվկիանոսում երկրի ափերի մոտ կոկաինի մեծ խմբաքանակ տեղափոխող երկու նավ են հայտնաբերել։ ՏԱՍՍ-ի փոխանցմամբ՝ այս մասին ասված է ռազմածովային նախարարության՝ շաբաթ երեկոյան հրապարակված հայտարարության մեջ։

Նավակների խուզարկության ժամանակ ընդհանուր առմամբ հայտնաբերվել է 1,6 տոննա կոկաին։ Մեքսիկայի յոթ քաղաքացիներ, որոնք ներգրավված են թմրամիջոցների ապօրինի շրջանառության մեջ, բերման են ենթարկվել և հանձնվել դատախազությանը։ Սպասվում է, որ առաջիկայում նրանց մեղադրանք կառաջադրվի։ Նախնական տվյալներով՝ կոկաինի տեղափոխումը կազմակերպել է մեքսիկական թմրակարտելներից մեկը։

Փետրվարի սկզբին, հյուսիսարևմտյան Սինալոա նահանգի ափերի մոտ, զինվորականները կալանել են նավ, որը տեղափոխում էր ավելի քան 2,5 տոննա մետամֆետամին և ավելի քան 100,000 ֆենտանիլ հաբեր: Կոպիտ հաշվարկներով՝ սև շուկայում ապօրինի բեռի ընդհանուր արժեքը կազմել է մոտ 90 մլն դոլար։