Իսրայելա-պաղեստինյան հակամարտության կարգավորում է սպասվում մոտ ժամանակում

Իսրայելի արտաքին գործերի նախարար Գաբի Աշկենազին ԱՄՆ պետքարտուղար Էնթոնի Բլինքենի հետ զրույցում ասել է, որ Իսրայելին ևս մի քանի օր է պետք՝ Գազայի հատվածում ռազմական գործողությունն ավարտելու համար, գրում է Axios պորտալը:

Բլինքենը, իր հերթին, հայտարարել է, որ Վաշինգտոնը ակնկալում է ռազմական գործողությունների դադարեցում մոտ ապագայում: Նա նաև նշել է, որ Միացյալ Նահանգները արգելափակելու է ՄԱԿ-ի Անվտանգության խորհրդում Գազայի հարցով Ֆրանսիայի նախաձեռնությունը:

Պաղեստինի և Իսրայելի վերաբերյալ ՄԱԿ-ի Անվտանգության խորհրդի բանաձևի ֆրանսիական նախագիծը կարող է քվեարկության դրվել մեկ օրվա ընթացքում: Այս մասին ՏԱՍՍ-ին հայտնել են կազմակերպության դիվանագիտական աղբյուրներից:

Ֆրանսիայի ներկայացրած բանաձևի նախագիծը պահանջում է անհապաղ հրադադար հաստատել Իսրայելում և Գազայի հատվածում, մարդասիրական օգնություն տրամադրել Գազայի բնակիչներին:

Փաստաթղթի տեքստը չի պարունակում մեղադրանքներ հակամարտության կողմերից որևէ մեկին:

Պաղեստինյան Համաս շարժման ղեկավարն էլ հայտարարել է, որ Պաղեստինի և Իսրայելի միջև զինադադարի պայմանագիր կարելի է կնքել մոտ ժամանակում մի քանի ժամվա կամ երկու օրվա ընթացքում: Դրա համար անհրաժեշտ է, որ կողմերը միաժամանակ դադարեցնեն ռազմական գործողությունները:

«ՌԻԱ Նովոստին», վկայակոչելով իսրայելական բանակի տվյալները, հայտնում է, որ լարվածության սրացման սկզբից ի վեր Գազայի հատվածից Իսրայելի տարածք է արձակվել շուրջ 4070 հրթիռ, որից 610-ը ընկել է հենց անկլավի շրջանում: