ՌԴ դեսպանը հուսով է, որ Հայաստանում կայանալիք ընտրությունները կնպաստեն հասարակության համախմբմանը
Հայաստանում կայանալիք արտահերթ խորհրդարանական ընտրությունները երկրի ներքին գործն են: Ռուսաստանը, բնականաբար, շատ ուշադիր հետևում է տեղի ունեցող իրադարձություններին: Այս մասին լրագրողների հետ զրույցում ասաց Հայաստանում ՌԴ արտակարգ և լիազոր դեսպան Սերգեյ Կոպիրկինը:
«Հուսով ենք, որ այս բոլոր գործընթացները կնպաստեն հասարակության համախմբմանը և այնպիսի խնդիրների լուծմանը, որոնց առջև կանգնած է հասարակությունը»,- ասաց Կոպիրկինը:
Ինչ վերաբերում է քաղաքական ուժերի հետ շփումներին, ՌԴ դեսպանը նշեց, որ դրանք չեն ավարտվել և շարունակական բնույթ են կրելու: «Դա մենք չենք թաքցնում, դրա մասին տեղեկություններ կան ԶԼՄ-ներում: Իհարկե, որևէ պատճառ չկա, որ պետք է հրաժարվեմ այդ պրակտիկայից: Սա դեսպանի, դիվանագետի գործառույթներից մեկն է` կապի մեջ լինել երկրի հասարակական և քաղաքական ուժերի ներկայացուցիչների հետ»,- ասաց Կոպիրկինը:
Հայաստանի Հանրապետության վարչապետ Նիկոլ Փաշինյանը մարտի 18-ին հայտնեց հունիսի 20-ին Հայաստանում արտահերթ խորհրդարանական ընտրությունների անցկացման մասին: Այս հայտարարությունից առաջ վարչապետը հանդիպել էր «Բարգավաճ Հայաստան» խմբակցության ղեկավար Գագիկ Ծառուկյանի հետ, իսկ ավելի վաղ՝ նաև «Լուսավոր Հայաստան» խմբակցության ղեկավար Էդմոն Մարուքյանի հետ:
Կարծիքներ