«Մենք»-ը օգնեց ու շարունակում է օգնել

Պատերազմի առաջին օրից սկսած Երևանում մի խումբ երիտասարդներ հանդես եկան տարբեր նախաձեռնություններով՝ ամուր պահելով թիկունքը։ «Մենք»-ը դրանցից մեկն էր։ Նախաձեռնության նպատակը ի սկզբանե եղել է Ddos հարձակում կազմակերպել ադրբեջանական մի շարք կայքերի ուղղությամբ, սակայն դա այդքան էլ հեշտ գործ չի եղել։ «Մենք»-ի նախաձեռնող  Սեյ Յայլախանյանը նշում է, որ իրենք սկսեցին պայքարել ապատեղեկատվության դեմ՝ փակելով ադրբեջանական և հայկական այն էջերը, որոնք կեղծ լուրեր էին տարածում և ներքին հրահրանք ստեղծում մարդկանց միջև։ Freenews.am-ը զրուցել է Սեյ Յայլախանյանի հետ, վերջինս պատմել է , թե ինչպիսի աշխատանքներով են հանդես եկել «Մենք»-ի շրջանակներում։

«Ժամանակի ընթացքում, բացի ապատեղեկատվության դեմ պայքարելուց՝ մենք մեր խմբակիցների հետ սկսեցինք գումարաային հանգանակություններ նվիրել , թե՛ «Հայաստան» համահայկական հիմնադրամին,  թե՛ Զինծառայողների ապահովագրության հիմնադրամին, թե՛  առանձին մարդկանց։ Պատերազմի առաջին օրերից մինչ այսօր,  դրսի և տեղի հայերի օգնությամբ  20-22 հազար դոլարի չափով գումար ենք հավաքել և ուղարկել  հիմնադրամներին»,- ասում է Սեյ Յայլախանյանը։

Բացի հանգանակություններ իրականացնելը , հումանիտար օգնություն ցուցաբերելը և ապատեղեկատվության դեմ պայքարելը՝ «Մենք»-ի թիմը պատերազմի օրերին փորձել է գտնել այն զինծառայողների հարազատներին, որոնք տեղեկություն չունեին իրենց որդիներից, եղբայրներից ,ամուսիններից ։

«Շատերը գտնվում էին անգիտակից վիճակում, շատերը պառկած էին հիվանդանոցներում, նրանց հարազատները տեղեկություններ չունեին, թե իրենց որդին, իրենց եղբայրը որտեղ են գտնվում։ Փորձում էինք ինչ որ նշաններով՝ կլինի դաջվածք, սպի , գտնել զինվորների հարազատներին ու մեզ մոտ դա ստացվում էր»,- նշում է Սեյը։

Սեյ Յայլախանյանը նշում է՝ Ֆեյսբուքում նոր  էջ է բացել,  կոչվում է  «Անմահ գունդ» ,որը  ծառայելու է հանուն մեկ գաղափարի:  Հենց այդ էջում տեղ են գտնելու՝ պատերազմի մասնակից, վիրավոր, զոհված բոլոր տղաների անունները, որպեսզի մարդիկ ճանաչեն մեր հերոսներին, իսկ մինչ այդ՝ «Մենք»-ը շարունակելու է օգտակար նախաձեռնություններով հանդես գալ: Խմբի անդամների  ջանքերով ՝ Ամանորի նախաշեմին  Արցախից Հայաստան եկած և Գյումրիում բնակություն հաստատած 56 արցախցի փոքրիկներ տոնական նվերներ կստանան։