Գորիսի պետական համալսարանը նոր ռեկտոր ունի

Գորիսի պետական համալսարանում մայիսի 30-ին տեղի է ունեցել խորհրդի նիստ, որի օրակարգում բուհի ռեկտորի ընտրության հարցն էր:

Նիստին ներկա էին խորհրդի բոլոր 20 անդամները: ԳՊՀ խորհրդի նախագահ Արտուշ Ղուկասյանը նշել է, որ ՀՀ ԿԳՄՍ նախարարության հայտարարած՝ ռեկտորի թափուր պաշտոնի բաց մրցույթին դիմել է չորս թեկնածու, սակայն Լեռնիկ Պետրոսյանի ներկայացրած դիմումի համաձայն` վերջինս չի մասնակցելու ընտրությանը․ տեղեկացնում են ԿԳՄՍՆ-ից։

«Մյուս երեք թեկնածուները ներկայացրել են Գորիսի պետական համալսարանի զարգացման և բարեփոխման իրենց հայեցակարգերը: Խորհրդի անդամները մի շարք հարցեր են ուղղել թեկնածուներին, որոնց հիմքում նախատեսվող բարեփոխումների իրականացման առավել առարկայական մոտեցումն էր, բուհը գիտահետազոտական միջավայր դարձնելու տեսլականը և այլն:

Հարցերին հաջորդել են ՀՀ Սյունիքի մարզպետ Ռոբերտ Ղուկասյանի և խորհրդի անդամների ելույթները: Ելույթներից հետո ԳՊՀ ռեկտորի ժամանակավոր պաշտոնակատար Թ. Մարությանը հայտարարել է ինքնաբացարկ։

Փակ (գաղտնի) քվեարկության արդյունքներով ռեկտորի երկու թեկնածուներից՝ Հրայր Պետրոսյան (կողմ՝ 1, դեմ՝ 18), Տիգրան Վանդունց (կողմ՝ 17, դեմ՝ 2), բոլորին դեմ՝ 1, Գորիսի պետական համալսարանի ռեկտոր է ընտրվել տեխնիկական գիտությունների թեկնածու, դոցենտ Տիգրան Վանդունցը»,- ասված է հաղորդագրությունում։