Սի Ծինփինը կայցելի Ղազախստան և Տաջիկստան

Չինաստանի նախագահ Սի Ծինփինը հուլիսի 2-ից 6-ը միջազգային շրջագայություն կկատարի, որի ընթացքում կմասնակցի Շանհայի համագործակցության կազմակերպության (ՇՀԿ) գագաթնաժողովին, կայցելի Ղազախստան ու Տաջիկստան։

Այս մասին տեղեկություն է տարածել Չինաստանի ԱԳՆ-ն։

«Հուլիսի 2-ից 6-ը Չինաստանի նախագահ Սի Ծինփինը Աստանայում կմասնակցի ՇՀԿ անդամ երկրների ղեկավարների խորհրդի 24-րդ նիստին և պետական այցեր կկատարի Ղազախստանի Հանրապետություն և Տաջիկստանի Հանրապետություն», - ասված է հաղորդագրության մեջ։ 

Ինչպես նշվում է, Ծինփինը  այս պետությունների ղեկավարների հրավերով կայցելի Ղազախստան և Տաջիկստան։

ՇՀԿ գագաթնաժողովը տեղի կունենա հուլիսի 4-ին Աստանայի Անկախության պալատում։

Ակնկալվում է, որ կազմակերպության գլխավոր քարտուղար Չժան Մինգը ներկա կլինի: Հանդիպմանը հրավիրված են ՄԱԿ-ի գլխավոր քարտուղար Անտոնիո Գուտերեշը և մի շարք միջազգային կազմակերպությունների ղեկավարներ։