Իրանում այսօր նախագահ են ընտրում

Իրանում մեկնարկել են նախագահական ընտրությունները։ Քվեարկելու իրավունք ունի 59 310 307 իրանցի։ Ըստ պաշտոնական վիճակագրության՝ ավելի քան 1․3 միլիոնն առաջին անգամ է քվեարկելու։

Ընտրատեղամասերը բացվել են տեղի ժամանակով ժամը 07։00-ին։ Քվեարկությունը կավարտվի կեսգիշերին։ Երկրում գործում է 72 հազար ընտրատեղամաս։ Իրանի քաղաքացիները կարող են քվեարկել ևս 133 երկրում։

Իրանում նախագահական 13-րդ ընտրություններն ընթանում են ՏԻՄ 6-րդ ընտրություններին զուգահեռ։

Նախագահի պաշտոնին հավակնում է 4 թեկնածու։ Ավելի վաղ 3 թեկնածուներ հայտարարել էին մասնակցությունից հրաժարվելու մասին։ Մասնակցության հայտ էր ներկայացրել 592 մարդ, որից 40-ը՝ կին։ Հավանություն էր տրվել միայն 7-ի մասնակցությանը։

Նախագահի պաշտոնին հավակնում է Խորհրդատվական խորհրդի քարտուղար Մոհսեն Ռեզային, դատական իշխանության ղեկավար Իբրահիմ Ռայիսին, խորհրդարանի փոխնախագահ Ամիրհոսեյն Կազիզադե-Հաշեմին և Կենտրոնական բանկի նախկին ղեկավար Աբդուլ Նասեր Հեմաթին։

Առաջին երեք թեկնածուները ներկայացնում են պահպանողականների ճամբարը, իսկ Աբդուլ Նասեր Հեմաթին՝ ռեֆորմիստներին։

Առաջին փուլում հաղթանակի համար թեկնածուն պետք է հավաքի ընտրողների ձայների ավելի քան 50 տոկոսը։ Հակառակ դեպքում կլինի երկրորդ փուլ, որը կարող է անցկացվել հունիսի 25-ին։