ՊԵԿ-ում քննարկվել է Մեղրիի սահմանային անցակետի վերակառուցման և արդիականացման ծրագրի ընթացքը

Պետական եկամուտների կոմիտեում տեղի է ունեցել աշխատանքային քննարկում Մեղրիի սահմանային անցակետի վերակառուցման և արդիականացման ծրագրի ընթացիկ աշխատանքների վերաբերյալ կապալառու ընկերության՝ «Թանա էներջի մենեջմենթ»-ի տնօրեն Բեհզադ Էսլահչիի հետ։ Այդ մասին հայտնում են ԱԺ-ից:

Քննարկման ընթացքում կոմիտեի ներկայացուցիչները ընդգծել են նախագծի կարևորությունն ու տեխնիկական հարցերում երկկողմանի գործակցության անհրաժեշտությունը։

Կարևորելով ծրագրի ընթացիկ հարցերի վերաբերյալ կոմիտեի հետևողականությունն ու աջակցությունը՝ շինարարական ընկերության ներկայացուցիչները նշել են, որ աշխատանքներն ընթանում են բնականոն հունով։

Մեղրիի սահմանային անցակետի վերակառուցման և արդիականացման շինարարական աշխատանքները մեկնարկել են 2023 թվականին և կավարտվեն 2026 թվականին, որի արդյունքում անցակետը կհամապատասխանի միջազգային չափանիշներին։