Ավստրալիայում ուզում են սպանել մրցավազքային աղավնուն, որը դիմացել է անսովոր 13 000 կիլոմետրանոց ճանապարհորդությանը

Ավստրալիայում ուզում են սպանել մրցավազքային աղավնուն, որը դիմացել է անսովոր 13 000 կիլոմետրանոց ճանապարհորդությանը՝ Միացյալ Նահանգներից Խաղաղ օվկիանոսի վրայով մինչեւ Ավստրալիա, որպեսզի նոր տուն գտնի։ Սակայն իշխանությունները թռչունին վտանգավոր են համարում եւ ուզում են սպանել նրան, հայտնում է AP-ը։

Մելբուռնի բնակիչ Քեւին Չելի-Բերդը հայտնաբերել է հյուծված թռչունին, որը դեկտեմբերի 26-ին եկել է իր հետնաբակ: Աղավնին անհետացել էր հոկտեմբերի 29-ին ԱՄՆ Օրեգոնա նահանգում մրցավազքից:

Փորձագետները կասկածում են, որ աղավնին, որին տղամարդը անվանել է Ջո՝ Միացյալ Նահանգների նորընտիր նախագահի անունով, բեռնատար նավի վրա է կատարել ուղեւորությունը, որպեսզի հատի Խաղաղ օվկիանոսը: Ջոյի սխրանքը գրավել է ավստրալիական լրատվամիջոցների, ինչպես նաեւ Ավստրալիայի խիստ կարանտինի տխրահռչակ ծառայության եւ տեսչության ուշադրությունը: Չելի-Բերդը ասել է, որ իշխանությունները զանգահարել են իրեն եւ խնդրել բռնել թռչունին, սակայն ինքն ասել է, որ չի կարող օգնել նրանց: Այժմ իշխանությունները քննարկում են թռչունների պրոֆեսիոնալ որսորդ վարձելու հնարավորությունը:

Գյուղատնտեսության նախարարությունը, որը զբաղվում է կենսաբանական անվտանգության հարցերով, հայտարարել է, որ աղավնուն «չի թույլատրվում մնալ Ավստրալիայում», քանի որ դա «կարող է սպառնալ Ավստրալիայի սննդի անվտանգությանը եւ վայրի թռչունների պոպուլյացիային»: «Սա կենսաբանական անվտանգության ուղղակի վտանգ է ստեղծում ավստրալիական թռչունների եւ մեր թռչնաբուծական ոլորտի համար»,- ասվում է գերատեսչության հայտարարության մեջ: