Վրաստանի ՆԳՆ աշխատակիցները ընտրության օրը բերման են ենթարկել ավելի քան 15 մարդու

Ընտրությունների օրը Վրաստանի ՆԳՆ աշխատակիցները բերման են ենթարկել ավելի քան 15 մարդու, քննվել է քվեարկության ընթացքում տեղի ունեցած ինը միջադեպ: Այս մասին ճեպազրույցում հայտարարել է ՆԳ փոխնախարար Կախա Սաբանաձեն:

Քրեական գործեր

Թբիլիսիի Գլդանիի շրջանի թիվ 79 ընտրատեղամասի մոտ տեղի ունեցած զանգվածային ծեծկռտուքի փաստով միանգամից վեց մարդ է բերման ենթարկվել: Լրատվամիջոցների հաղորդմամբ, առճակատման մասնակիցները երկու կուսակցության ՝ իշխող «Վրացական երազանքի» և ամենամեծ ընդդիմադիր ուժի ՝ «Միացյալ ազգային շարժման» կողմնակիցներ էին: Դեպքի կապակցությամբ հետաքննություն է սկսվել Վրաստանի քրեական օրենսգրքի 126-րդ հոդվածի 1-ին մասով, որը ենթադրում է բռնություն:

Ըստ «Վրաստանի երիտասարդ իրավաբանների ասոցիացիա» ՀԿ-ի, ծեծկռտուքի ժամանակ վիրավորվել են երկու լրագրող՝ Publica- ի և ընդդիմադիր Pirveli հեռուստաալիքի աշխատակիցները:

Վրաստանի քրեական օրենսգրքի 126-րդ հոդվածի 1-ին մասի համաձայն՝ քննվում է Թբիլիսիի Իսանի-Սամգորի շրջանում գտնվող Կախեթի մայրուղու թիվ 36 ընտրատեղամասում տեղի ունեցած միջադեպը:

Քրեական գործ է հարուցվել նաև Սենակիի (Սամեգրելո-Զեմո Սվանեթի մարզ) թիվ 16 ընտրատեղամասում դիտորդի նկատմամբ բռնության փաստի առթիվ:

Վարչական վարույթ

«Ընտրական գործընթացում տեղի ունեցած ինը միջադեպի հետաքննություն է սկսվել: Ներկայումս կատարվում են քննչական և դատավարական գործողություններ», – ասաց ՆԳՆ պետի տեղակալը:

Ինչ վերաբերում է վարչական իրավախախտումներին, ապա այդպիսի 15 փաստ է գրանցվել ամբողջ օրվա ընթացքում, որոնցից յոթի համար վարչական վարույթ է ընթանում: Տասը մարդ բերման է ենթարկվել:

Վրաստանում խորհրդարանական ընտրություններ են: Դրանց մասնակցում էր 48 կուսակցություն և երկու դաշինք: Ընտրվել են 150 պատգամավոր՝ 120-ը համամասնականի և 30-ը՝ մեծամասնական ընտրակարգով: Քվեարկելու իրավունք ունեին ավելի քան 3,5 միլիոն Վրաստանի քաղաքացի: Ժամը 08:00-20:00-ը աշխատել է մինչև 3,8 հազար ընտրատեղամաս: