Եվրոպան պահանջում է ազատ արձակել Նավալնիին և Ռուսաստանին սպառնում է նոր պատժամիջոցներով

Ռուս ընդդիմադիր գործիչ, հայտնի բլոգեր Ալեքսեյ Նավալնիի կալանավորումը և շաբաթ օրը նրան աջակցող ցույցերի ճնշումը պետք է Ռուսաստանի դեմ նոր պատժամիջոցներ կիրառելու պատճառ հանդիսանա, կարծում են Եվրոմիության մի շարք անդամներ: Հայտնում է BBC Russia-ն։

Էստոնիայի, Լատվիայի և Լիտվայի արտաքին գործերի նախարարությունները կոչ են անում պատժամիջոցներ կիրառել այն պաշտոնյաների նկատմամբ, որոնք պատասխանատու են հանգստյան օրերին անցկացվող ձերբակալությունների կազմակերպման համար։

Ռուսաստանի իրավապահների գործողությունները դատապարտվել են ֆրանսիացի և գերմանացի քաղաքական գործիչների, ինչպես նաև ԱՄՆ պետքարտուղարության կողմից:

Երկուշաբթի օրը ԵՄ (Եվրոմիության) առաջնորդները դաշինքի արտգործնախարարների հանդիպմանը կքննարկեն պատժամիջոցները խստացնելու հարցը։ Դրա մասին է հայտնել ԵՄ արտգործնախարար Ժոզեպ Բորրելը իր Twitter- ում։ Նա նախազգուշացրեց, որ Դաշինքը ուշադիր կհետևի Նավալնիի ճակատագրին և եզրակացություններ կանի, որոնք կազդեն Ռուսաստանի հետ հարաբերությունների վրա:

Նշենք, որ շաբաթ, հունվարի 23-ին, ի պաշտպանություն ընդդիմության առաջնորդ Ալեքսեյ Նավալնիի ցույցեր անցկացվեցին Մոսկվայում, Սանկտ Պետերբուրգում և Ռուսաստանի 75 այլ քաղաքներում։ Ըստ «Սպիտակ հաշվիչ» նախագծի անդամ Դմիտրի Նեստերովի՝ այս անգամ ծրագրի համակարգողները չեն կարողացել ճշգրիտ հաշվարկել մարդկանց թվաքանակը, իր խոսքերով ցույցի գագաթնակետին մասնակցում էին մոտ 10-15 հազար մարդ։

Մոսկվայի կենտրոնում չհամաձայնեցված ցույցի ընթացքում բերման ենթարկված բոլոր անչափահասները իրենց ծնողների ժամանումից հետո ազատ են արձակվել, հայտնում է Մոսկվայի երեխաների օմբուդսմեն Օլգա Յարոսլավսկայան: Ռուսաստանի երեխաների օմբուդսմեն Աննա Կուզնեցովան հայտարարել է, որ շուրջ 300 պատանիներ էին բերման ենթարկվել, այդ թվում ՝ մոտ 70-ը Մոսկվայում, և 30-ը ՝ Սանկտ Պետերբուրգում:

Ըստ «ОВД-Инфо» - ի ՝ ամբողջ երկրում բողոքի ցույցերի ընթացքում ձերբակալվել է 3500 մարդ:

Մոսկվայում ոստիկանությունը բերման է ենթարկել 1,396 ցուցարարի, Սանկտ Պետերբուրգում ՝ 523:

Ներքին գործերի նախարարությունը ձերբակալությունների վերաբերյալ պաշտոնական տվյալներ դեռ չի հրապարակել: