Պուտինը երկրորդ անգամ է պատվաստվել

ՌԴ նախագահ Վլադիմիր Պուտինը պատվաստվել է կորոնավիրուսի դեմ երկրորդ անգամ: Նրա առողջությունը նորմալ է, ոչ մի կողմնակի ազդեցություն չկա,-հայտարարել է ՌԴ նախագահի մամուլի քարտուղար Դմիտրի Պեսկովը:

Առաջին դեղաչափի պատվաստումից հետո ՌԴ նախագահը պատմել էր, որ թույլ անհարմարություն էր զգացել ձախ ձեռքում: Ամեն դեպքում պատվաստման օրը՝ քնելուց առաջ ջերմաչափ էր դրել կողքի սեղանին:

«Չգիտեմ, թե ինչ է եղել նախագահի սեղանին, բայց հաշվի առնելով նրա ծանրաբեռնված աշխատանքային գրաֆիկը, նրա առողջությունը նորմալ է, ինչպես առաջին պատվաստման ժամանակ: Այժմ էլ ոչ մի կողմնակի ազդեցություն չկա»,- ասել է Կրեմլի ներկայացուցիչը:

Հիշեցնենք՝ առաջին դեղաչափը Պուտինը ստացել էր մարտի 23-ին: Թե կոնկրետ ինչ պատվաստանյութ է ստացել, չի նշվում:

Ներկայումս ՌԴ-ում գրանցված է երեք պատվաստանյութ՝ «Սպուտնիկ V», «Էպիվակորոնա» և «Կովիվակ»:

Դմիտրի Պեսկովը կարծում է, որ ՌԴ նախագահին պատվաստելը կնպաստի նրան, որպեսզի ՌԴ քաղաքացիները ևս պատվաստվեն:

«Շատ քաղաքներում Պուտինի անձնական օրինակը դրդել է, որպեսզի բնակիչները ևս պատվաստվեն»,- ասել է Պեսկովը:

Նա նշել է, որ առայժմ պատվաստվել ցանկացողների թիվը քիչ է: Մինչդեռ նպատակն է հասնել բնակչության մեծամասնության իմունիզացիայի: