Ղազախստանում 230 մարդ է զոհվել հունվարյան անկարգությունների ժամանակ

Ղազախստանում 230 մարդ է զոհվել հունվարյան զանգվածային անկարգությունների ժամանակ: Այդ մասին, ինչպես տեղեկացնում է «Արմենպրես»-ը, հայտնել Է գլխավոր դատախազ Բերիկ Ասիլովը:

«Ընդամենը երկրում հունվարյան իրադարձությունների ընթացքում զոհվել է 230 մարդ, այդ թվում՝ 19 զինվորական և ուժային»,-ասել է Ասիլովը՝ Մաժիլիսում հանդես գալով մարտի 14-ին տեղի ունեցած նիստում: Նրա խոսքով՝ ամենից շատ մարդիկ զոհվել են Ալմաթիում՝ 139 քաղաքացի: Ավելի վաղ հաղորդվել էր 227 մարդու զոհվելու մասին:

«Այսօր հաստատվել է, որ վարչական շենքերի վրա գրոհները ետ մղելիս և իրավակարգի հաստատման ընթացքում վերացվել է 86 հարձակվող: Պարզվում են 53 զոհվածների մահվան հանգանքները, նրանք հայտնաբերվել են քաղաքի տարածքում՝ տարբեր վերքեր ստացած, այդ թվում՝ 48-ը՝ հրաձգային, երկուսը՝ դանակի, երեքը՝ այլ վնասվածքներով ու այրվածքներով»,-ասել է նա:

Դրա հետ մեկտեղ Ասիլովը հայտնել է, որ «մյուս յոթ տարածաշրջաններում 63 հարձակվող ոչնչացվել է իրավակարգի, ոստիկանության, Ազգային անվտանգության կոմիտեի դեպարտամենտների ուժերով»: