Ընդդիմությունն ու Քոչարյանն ակտիվացան, երբ ուժի մեջ մտավ ապօրինի գույքի բռնագանձման մասին օրենքը. Ռուբինյան

«Ընդդիմության կողմից, այո՛, հնչել են վիրավորական արտահայտություններ, մեր խմբակցության կողմից տրվել են քաղաքական պատասխաններ»:

Այս մասին Հանրային հեռուստաընկերության եթերում, անդարադառնալով Ազգային ժողովում տեղի ունեցած վերջին իրադարձություններին, ասել է ԱԺ փոխնախագահ Ռուբեն Ռուբինյանը՝ չհամաձայնելով հաղորդավարի դիտարկմանը, թե ընդդիմության տված մեկ վիրավորանքին իրենց խմբակցությունը 5 վիրավորանքով է պատասխանել:

Ռուբինյանը նշեց՝ ՔՊ խմբակցության ոչ մի պատգամավոր չի հայհոյել, իսկ այսօրվա ԱԺ նիստը, իհարկե, լավագույններից չէր, բայց գույները խտացնել էլ պետք չէ:

ԱԺ փոխնախագահը, հիշեցնելով վերջին շրջանում ընդդիմության և Ռոբերտ Քոչարյանի ակտիվությունը, ընդդիմադիր խմբերի կողմից իշխանափոխության տարբեր փորձերն ու հայտարարությունները, այդ ամենը կապեց այն հանգամանքի հետ, որ դրանք սկսվել են, երբ ուժի մեջ է մտել ապօրինի գույքի բռնագանձման մասին օրենքը:

«Գրեթե ամեն օր հրապարակվում են վճիռներ, որոնցով պետական բյուջե են վերադարձվում թալանված գումարները: Մի քանի օր առաջ Գլխավոր դատախազը ևս մեկ անգամ հիշեցրեց, որ Քոչարյանի ընտանիքից պահանջվում է բռնագանձել անշարժ գույք, դրամական միջոցներ, ներդրումներ և այլն և այսօր իմ գործընկեր Բաբկեն Թունյանը գումարել էր այդ ամենը և հաշվել, որ միայն դրամական միջոցները գերազանցում են 100 մլն դոլարը, չհաշված 22 անշարժ գույքն ու մնացածը:

Տրամաբանական կապն ակնհայտ է և սա իրենց թիմի գործելաոճն է»,- նշեց Ռուբինյանը՝ հիշեցնելով Գյումրիում նաև Վարդան Ղուկասյանի հայտարարությունները, ըստ որոնց, ինքը վերադառնում է քաղաքականություն, քանի որ ուզում են բռնագանձել իր ունեցած գույքն ու միջոցները:

Ռուբինյանի խոսքով՝ Քոչարյանը քաղաքականության մեջ է նույն սկզբունքով՝ իր ունեցած ապօրինի գույքն ու միջոցները պաշտպանելու համար:

«Էս ամբողջ կրկեսը Ազգային ժողովում, որ իրենք ստեղծում են, միայն դրա համար է ու նաև՝ առաջիկա ընտրություններում մասնակցության համար»,- նշեց Ռուբինյանը:

Վերադառնալով ԱԺ-ում տեղի ունեցածին, վերջինս նշեց, որ զավեշտալի է, երբ դատախազությունը մեկին մեղադրում է 100 հազար դոլար ու 22 գույք ապօրինի «տակով անելու» մեջ ու վերջինս ԱԺ ամբիոնից իրենց «դավաճան և կոռուպցիոներ» է անվանում:

«Ինքը, բնական է, դրա պատասխանը պետք է ստանա ու շատ այլ բաների պատասխան էլ»,- նշել է Ռուբինյանը: