Ուկրաինական պատվիրակությունը մեկնել է ՌԴ ներկայացուցիչների հետ բանակցությունների

Ուկրաինայի նախագահի գրասենյակի ղեկավարի խորհրդական Միխայիլ Պոդոլյակը լուսանկար է հրապարակել ուղղաթիռից։

Ուկրաինայի պատվիրակությունը կեսօրից հետո մեկնել է Ռուսաստանի հետ բանակցությունների։ Տեղեկությունը հայտնում է Ուկրաինայի նախագահի գրասենյակի ղեկավարի խորհրդական Միխայիլ Պոդոլյակը։

Պաշտոնյան Twitter-ում լուսանկար է հրապարակել, որում ինքն ու «Ժողովրդի ծառա» խորհրդարանական խմբակցության ղեկավար Դավիթ Արախամիան նստած են ուղղաթիռի խցիկում ։

«Գնում ենք ՌԴ–ի հետ բանակցությունների։ Արդեն ուղղաթիռներում ենք։ Մի քանի ժամից կսկսենք...», - գրել է Պոդոլյակը։

ՌԴ նախագահի օգնական, ռուսական պատվիրակության ղեկավար Վլադիմիր Մեդինսկին ավելի վաղ հայտնել էր, որ բանակցությունները կկայանան Բրեստի մարզում։ Հանդիպումը կարող է սկսվել ժամը 15:00-ին (Երևանի ժամանակով` 16։00-ին):

Նշենք, որ բանակցությունների առաջին փուլը կայացել է փետրվարի 28-ին Բելառուսի Գոմելի մարզում։