Բրազիլիայի նախագահին կրկին տուգանել են դիմակի բացակայության համար

Բրազիլիայի նախագահ Ժաիր Բոլսոնարուին կրկին տուգանել են պաշտպանիչ դիմակի բացակայության համար։ Նրան առանց դիմակի նկատել են Սան-Պաուլու նահանգում մոտոմրցարշավի ժամանակ, հայտնում է Associated Press-ը։

Նահանգային իշխանությունների հաղորդմամբ՝ միջոցառմանը, որն անցկացվել է հունիսի 12-ին, մասնակցել է 12 հազար մոտոցիկլիստ, որոնց մեծ մասը եղել է պաշտպանիչ սաղավարտներով, սակայն առանց դիմակի։

Նահանգում 2020 թվականի մայիսից գործում է հանրային վայրերում առանց դիմակի գտնվելու արգելը, որը նախատեսում է մոտ 110 դոլարի համարժեք տուգանք։

Ավելի վաղ Բոլսոնարուին տուգանել էին մայիսի վերջին Մարանյան նահանգում անցկացված հանրահավաքին առանց դիմակի մասնակցելու համար։