ԱՄՆ-ն «Հյուսիսային հոսք 2-ի» շուրջ բանակցություններ է սկսել Գերմանիայի հետ
![ԱՄՆ-ն «Հյուսիսային հոսք 2-ի» շուրջ բանակցություններ է սկսել Գերմանիայի հետ](https://freenews.am/uploads/images/image_750x_602bee664c1b5.jpg)
ԱՄՆ վարչակազմը՝ նախագահ Ջո Բայդենի գլխավորությամբ, բանակցություններ է սկսել Գերմանիայի իշխանությունների հետ՝ «Հյուսիսային հոսք 2» նախագծի ապագան որոշելու համար: Այս մասին տեղեկացրել է The Wall Street Journal պարբերականը` հղում տալով մի քանի աղբյուրների, գրում է ՏԱՍՍ գործակալությունը:
Գերմանիայի ներկայացուցչի խոսքերով, խորհրդակցություններում, մասնավորապես, քննարկվում է «Հյուսիսային հոսք 2-ի կառուցման մեջ ներգրավված ընկերությունների դեմ պատժամիջոցների սպառնալիքը»:
Պարբերականը նշում է, որ ԱՄՆ վարչակազմը վերանայում է իր արտաքին քաղաքականությունը նախագծի վերաբերյալ այն բանից հետո, երբ փետրվարի 6-ին Fortuna նավը սկսել էր խողովակներ տեղադրել Դանիայի ջրերում:
Բայդենը դեռ չի հայտնել իր կարծիքը այս նախագծի վերաբերյալ: Սակայն, ըստ Սպիտակ տան մամուլի քարտուղար Ջեն Փսակիի` նախագահի դիրքորոշումն այն է, որ «Հյուսիսային հոսք 2»-ը վատ գործարք է Եվրոպայի համար»: Միևնույն ժամանակ, թերթն ընդգծում է, որ դա ասվել է նաև մինչև փետրվարի 6-ին վերսկսված գազատարի տեղադրումը:
Կարծիքներ