Կանանց Բրազիլիայի հավաքականի հարձակվող Մարթան՝ Օլիմպիական խաղերի ռեկորդակիր

Կանանց Բրազիլիայի հավաքականի հարձակվող Մարթան դարձավ առաջին ֆուտբոլիստը, որը հինգ Օլիմպիական խաղերում առնվազն մեկ գոլ է խփել: Հաղորդում է Armsport.am-ը։

Չորեքշաբթի օրը բրազիլացիները Տոկիոյի խաղերի խմբային փուլի առաջին խաղում 5։0 հաշվով ջախջախեցին Չինաստանի հավաքականին:

9-րդ և 74-րդ րոպեներին Մարթան աչքի ընկավ գոլերով: Նա Օլիմպիական խաղերում իր առաջին գոլը խփել էր 2004 -ին Աթենքի մրցաշարում։ Մարթան երկու անգամ Օլիմպիական խաղերի արծաթե մեդալակիր է դարձել Բրազիլիայի ֆուտբոլի կանանց ազգային հավաքականի հետ (Աթենք 2004 և Պեկին 2008)։

Նշենք, որ 2019թ․ Աշխարհի առաջնությունում նա դարձավ ևս մեկ ունիկալ ռեկորդի հեղինակ․ նա միակ ֆուտբոլիստն է (թե տղամարդկանց, թե կանանց շրջանում), որը գոլ է խփել 5 ԱԱ-ներում։