Սահմանազատման հարցերով Հայաստանի և Ադրբեջանի հանձնաժողովների առաջին հանդիպումը կառուցողական է եղել․ Մհեր Գրիգորյան

Մայիսի 24-ին երկու երկրների սահմանին տեղի ունեցած սահմանազատման և սահմանների անվտանգության հարցերով Հայաստանի և Ադրբեջանի ազգային հանձնաժողովների առաջին հանդիպումն անցել է կառուցողական ճանապարհով: Այս մասին ՏԱՍՍ-ի թղթակցի հետ զրույցում ասել է հայկական հանձնաժողովի նախագահ,  փոխվարչապետ Մհեր Գրիգորյանը։

«Իսկապես, մայիսի 24-ին մենք առաջին հանդիպումն անցկացրինք սահմանին։ Այս հանդիպմանը մենք քննարկել ենք բացառապես հետագա համատեղ աշխատանքի կազմակերպչական հարցեր, և այդ առումով հանդիպումը համարում եմ միանգամայն կառուցողական։ Սահմանազատման և սահմանների անվտանգության հարցերի հանձնաժողովների հաջորդ հանդիպման ամսաթվի վերաբերյալ դեռևս պայմանավորվածություններ չկան, սակայն կա հաստատում, որ հանդիպումը կկայանա Մոսկվայում»,- նշել է նա:

Գրիգորյանը հաստատել է, որ հաջորդ շաբաթ Մոսկվայում տեղի կունենա եռակողմ աշխատանքային խմբի նիստը, որը նվիրված է տարածաշրջանում տրանսպորտային և տնտեսական կապերի ապաշրջափակմանը՝ Հայաստանի, Ռուսաստանի և Ադրբեջանի փոխվարչապետների համատեղ նախագահությամբ:

«Այս հանդիպման կոնկրետ ամսաթիվը այժմ համաձայնեցման գործընթացում է, իսկ հանդիպման օրակարգը ներառում է Հայաստանի, Ռուսաստանի և Ադրբեջանի ղեկավարների 2020 թվականի նոյեմբերի 9-ի (10) եռակողմ հայտարարության 9-րդ կետում ամրագրված պայմանավորվածությունների իրականացմանը և 2021 թվականի հունվարի 11-ի հայտարարությանը վերաբերող հարցեր: Այս օրակարգը սահմանազատման հետ կապ չունի»,- հավելել է նա։

Մայիսի 23-ին Հայաստանի վարչապետ Նիկոլ Փաշինյանը եւ Ադրբեջանի նախագահ Իլհամ Ալիեւը հրամանագրեր են ստորագրել սահմանների սահմանազատման եւ անվտանգության հանձնաժողովներ ստեղծելու մասին: