Վրաստանը շահագրգռված է Հայաստանի կայունությամբ․ Սամցխե-Ջավախքում տեղի է ունեցել երկու երկրների խորհրդարանների պատվիրակությունների հանդիպումը

Վրաստանի խորհրդարանի առաջին փոխխոսնակ, Վրաստան-Հայաստան խորհրդարանական բարեկամության խմբի ղեկավար Գիա Վոլսկին Սամցխե-Ջավախքի տարածաշրջանում ընդունել է Հայաստանի Հանրապետության ազգային ժողովի փոխնախագահ, Հայաստան-Վրաստան պատգամավորական բարեկամության խմբի ղեկավար Ռուբեն Ռուբինյանի գլխավորած պատվիրակությանը։

«Արմենպրես»-ի փոխանցմամբ՝ այս մասին հայտնում է Վրաստանի խորհրդարանի մամուլի ծառայությունը՝ հավելելով, որ խորհրդարանական բարեկամության խմբի պատվիրակությունը՝ ի դեմս Թենգիզ Շարմանաշվիլիի, Անտոն Օբոլաշվիլիի և Սամվել Մանուկյանի, հայ գործընկերների հետ այցելել է Ախալքալաքի Սուրբ Խաչ եկեղեցի և Ախալքալաքի ու Կումուրդոյի թեմի տաճար: Թեմի միտրոպոլիտ Տեր Նիկոլոզը հյուրերի հետ շրջայց է կատարել թեմական թանգարանում և նրանց է ներկայացրել թանգարանի ստեղծման պատմությունը։ 

«Խորհրդարանի բարեկամական խմբի անդամների, ինչպես նաև Սամցխե-Ջավախքի տարածաշրջանի տեղական մարմնի և Սակրեբուլոյի ներկայացուցիչների հետ ունեցած հանդիպումներում ընդգծվել է ինչպես ներքին, այնպես էլ արտաքին ուղղություններով միմյանց աջակցելը: Մենք ուրախ ենք, որ Վրաստանի կառավարությունը պատշաճ ուշադրություն է դարձնում տարածաշրջանի հայ բնակչությանը, և մենք մեր կողմից աջակցում ենք Վրաստանի կառավարությանը՝ նախաձեռնած բոլոր գործերում», - ասել է ՀՀ ԱԺ փոխխոսնակ Ռուբեն Ռուբինյանը։ 

Հաղորդվում է, որ Սամցխե-Ջավախք կատարած աշխատանքային այցի շրջանակներում բարեկամության խմբի անդամները հանդիպել են Ախալցխայի բնակչության և տեղական ինքնակառավարման մարմնի ներկայացուցիչների հետ, որտեղ քննարկվել են վրաց-հայկական համագործակցության ներկա ուղղությունները և կապերի ապագա խորացման կարևորությունը:

«Ախալցխայում տեղի է ունեցել Վրաստան-Հայաստան խորհրդարանական բարեկամության խմբի համանախագահների հանդիպումը` Վրաստանի և Հայաստանի խորհրդարանների պատգամավորների մասնակցությամբ։  Հանդիպել ենք նաև տարածաշրջանի և տեղական ինքնակառավարման մարմինների ներկայացուցիչների հետ։  Կարծում եմ, որ պետք է հատուկ ընդգծել մեկ հանգամանք՝ դա վրացական կողմի շահագրգռվածությունն է Հայաստանի կայունության նկատմամբ, ինչպես նաև Հայաստանի խորը շահագրգռվածությունն ու պրագմատիկ մոտեցումն այն կայունության նկատմամբ, որը մեր երկիրը պահպանել է այս բարդ իրավիճակում։ Հարևանները պետք է լավ իմանան միմյանց խնդիրները։ Մենք աջակցում ենք Հայաստանի և Ադրբեջանի խնդրի կարգավորմանը, որը շատ մոտ է վերջնական հանգուցալուծմանը։  Հանդիպմանը քննարկել ենք տարբեր հարցեր, այդ թվում՝ խորհրդարանական համագործակցությունը և փոխադարձ հետաքրքրություն ներկայացնող ուղղությունները», - իր խոսքում նշել է Գեորգի Վոլսկին։

Վրաստանի խորհրդարանի մամուլի ծառայությունը նաև հավելել է, որ Սամցխե-Ջավախքի տարածաշրջանում կայացած հանդիպումներին մասնակցել են տարածաշրջանի պետական հանձնակատար Բեսիկ Ամիրանաշվիլին, Հայաստանում Վրաստանի արտակարգ և լիազոր դեսպան Գիորգի Շարվաշիձեն և Վրաստանում Հայաստանի արտակարգ և լիազոր դեսպան Աշոտ Սմբատյանը:

Ռուբեն Ռուբինյանի գլխավորած պատվիրակության կազմում են ՀՀ ԱԺ «Քաղաքացիական պայմանագիր» խմբակցության պատգամավորներ Շիրակ Թորոսյանը, Վահագն Ալեքսանյանը, ինչպես նաև ընդդիմադիր «Հայաստան» խմբակցության պատգամավոր Արծվիկ Մինասյանը։