Թբիլիսիում ռեստորանատերերը երթ են անցկացրել` պահանջելով բացել հասարակական սննդի հաստատությունները

Թբիլիսիում ռեստորանային բիզնեսի սեփականատերերն ու աշխատողները երթ են կազմակերպել դեպի Կառավարության պալատ ՝ պահանջելով վերացնել սահմանափակումները, որոնք արգելում են նրանց լիարժեք աշխատել կորոնավիրուսի տարածման պատճառով: Այս մասին հաղորդում է վրացական «Ռուսթավի 2» հեռուստաալիքը:

«Հիմա մենք Պուշկինի հրապարակում ենք: Մոտավորապես 100-500 մ հեռավորության վրա կան հյուրանոցներ, որոնք կարող են հյուրեր ընդունել: Նրանք ունեն ֆիթնես կենտրոններ, ռեստորաններ: Նրանք գործում են: Թող մեկը ինձ բացատրի, թե ինչ տարբերություն կա հյուրանոցի ռեստորանի և սովորականի միջև: Ինչու՞ նրանք կարող են, իսկ մենք` ոչ», – լրագրողների հետ զրույցում ասել է Վրաստանի Ռեստորանատերերի ասոցիացիայի ղեկավար Շոթա Բուրջանաձեն:

Բողոքի ակցիան անցկացվում է «Բացեք երկիրը» կարգախոսի ներքո: Ֆիթնեսի հրահանգիչները և ընդդիմադիր գործիչները համերաշխություն են հայտնել ցուցարարներին, ովքեր կարծում են, որ իշխանությունների կողմից սահմանված սահմանափակումները քայքայում են երկրի տնտեսությունը: Միևնույն ժամանակ, վրացական ավելի քան 200 ռեստորաններ և սրճարաններ, ի նշան սահմանափակումների  դեմ բողոքի, մինչև շաբաթ օրվա վերջ դադարեցրել են սպասարկումը և սննդի առաքման ծառայությունները: