Ավազակային հարձակում Կապանում

Փետրվարի 20-ին, ժամը 08.50-ին, ոստիկանության Կապանի բաժին հաղորդում է ստացվել, որ Երկաթուղայինների 5-րդ նրբանցքի տներից մեկում միայնակ ապրող տարեց տղամարդու վրա հարձակվել են, դանակով հարվածել ոտքին և տնից գումար հափշտակել:
Դեպքի վայր մեկնած օպերատիվ խմբի ծառայողները պարզել են, որ փետրվարի 19-ին, ժամը 22.30-ից 23.00-ն ընկած ժամանակահատվածում, անհայտ անձը պատուհանի ցանցը պոկել և մտել է նշված տուն։ Փող ու ոսկի պահանջելով՝ սպառնացել է 81-ամյա տանտիրոջը, ապա կտրող-ծակող գործիքով վնասել նրա ազդրն ու ականջները։ 120.000 դրամ և բջջային հեռախոս ստանալուց հետո անհայտ անձը դիմել է փախուստի:
Ոստիկանության Կապանի բաժնի ծառայողները ձեռնարկում են անհրաժեշտ օպերատիվ-հետախուզական միջոցառումներ՝ հանցագործություն կատարած անձի ինքնությունը պարզելու և նրան հայտնաբերելու ուղղությամբ։
Քաղաքացիներին հորդորում ենք՝ արարքը կատարած անձի ինքնության կամ գտնվելու վայրի վերաբերյալ որևէ տեղեկություն ունենալու դեպքում հայտնել ոստիկանություն։ Տեղեկություններ տրամադրած անձի գաղտնիությունը երաշխավորվում է։

Այս մասին հայտնում են ՀՀ ոստիկանությունից:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: