Արտահերթ նիստ հրավիրելու հարց չկա, դա «Բագրատ Brothers»-ի օրակարգում է. Անդրանիկ Քոչարյան

«Քաղաքացիական պայմանագիր» խմբակցության օրակարգում արտահերթ նիստ հրավիրելու հարց չկա:

Այս մասին «Ազատության» եթերում հայտարարել է ԱԺ «Քաղաքացիական պայմանագիր» խմբակցության պատգամավոր Անդրանիկ Քոչարյանը։

«Ոչ, մեր օրակարգում այդպիսի հարց չկա, դա «Բագրատ Brothers»-ի օրակարգում է, որը մեր օրակարգի հետ չի համընկնում, ընդհանրապես, տվյալ հոգևորականի մոտ քաղաքական օրակարգը բացակայում է»,- ասել է նա։

Դիտարկմանը, որ արտահերթ նիստ կարող է օրենքի ուժով գումարվել եկող երկուշաբթի, եթե ՔՊ-ն այսօր համաձայնություն չտա, այդ դեպքում էլ կտապալե՞ն՝ Քոչարյանն արձագանքել է. «Հետևեք զարգացումներին, ամեն ինչ լինելու է օրենքի շրջանակներում»։

Նշենք, որ  «Հայաստան» և « Պատիվ ունեմ» խմբակցություններն այսօր միջնորդություն են ներկայացրել Ազգային ժողովի խորհրդին՝ վաղը կամ մինչև հունիսի 17-ն արտահերթ նիստ գումարելու պահանջով՝ Ազգային ժողովի ուղերձը կառավարության հրաժարականի և նոր կառավարության ձևավորման մասին օրակարգով։

Եթե Ազգային ժողովի խորհուրդը մերժի ընդդիմադիր խմբակցությունների միջնորդությունը, ապա Ազգային ժողովի կանոնակարգ օրենքի համաձայն՝ 5-րդ աշխատանքային օրը՝  հունիսի 17-ին՝ ժամը 18։30 -ին, օրենքի ուժով կգումարվի Ազգային ժողովի արտահերթ նիստ։

Հիշեցնենք՝ Գալստանյանը երեկ դիմել է Ազգային ժողովի խմբակցություններին, որպեսզի ընդդիմադիրները հունիսի 11-ին՝ ժամը 16:30-ին, նախաձեռնեն նիստ՝ կառավարության հրաժարականի և նոր կառավարության ձևավորման օրակարգով:

«Հունիսի 10-ին ԱԺ խորհուրդը պարտավոր է որոշում ընդունել արտահերթ նիստ հրավիրելու մասին։ Պատգամավորները պարտավոր են գործել ժողովրդի կամքով»,- ասել էր նա: