Շոլցը Ռուսաստանին խոստացել է «շատ մաշտաբային, շատ կոշտ» պատժամիջոցներ՝ իրավիճակի լարման դեպքում
Գերմանիայի կանցլեր Օլաֆ Շոլցն հայտարարել է, որ արևմտյան երկրների ջանքերն ուղղված են այն բանին, որ Ռուսաստանի դեմ պատժամիջոցներ կիրառելու անհրաժեշտություն չլինի։ Նրա խոսքով՝ Ուկրաինայի շուրջ իրավիճակի սրման դեպքում խիստ սահմանափակումներ կմտցվեն ՌԴ-ի դեմ: Նա չի բացառել, որ պատժամիջոցներ սահմանվեն նաև «Հյուսիսային հոսք 2»-ի դեմ: Ըստ նրա՝ ոչինչ չի բացառվում:
«Մենք մեր ԵՄ և ԱՄՆ դաշնակիցների հետ կոնկրետ նախապատրաստություններ ենք արել: Քննարկում ենք հնարավոր պատժամիջոցները. դրանք շատ լայնածավալ ու շատ կոշտ են, եթե դրանց անհրաժեշտությունը լինի, թեև այժմ մեր բոլոր ջանքերն ուղղված են՝ ապահովելու, որ դրանց անհրաժեշտությունը չլինի»,-ասել է պարոն Շոլցը։
Գերմանիայի կանցլերը բացառել է Ուկրաինային մահաբեր զենքի մատակարարումը։ Նա նշել է, որ Գերմանիան զենք չի ուղարկում ճգնաժամային շրջաններ։ Նշել է, որ այդ ուղղությանը «հետևել է իր նախորդը և այն եղել և մնում է ճիշտ»։
Լրատվամիջոցների տվյալներով՝ ԱՄՆ-ը և Եվրոպան սահմանափակումներ են նախապատրաստում բանկերի, պետական ձեռնարկությունների, գործարարների, ինչպես նաև՝ որոշակի ապրանքների արտահանման և ներմուծման համար։Դիտարկվում է Ռուսաստանը SWIFT համաշխարհային ֆինանսական համակարգից անջատելու տարբերակը։ NYT-ը նշում է, որ նախկինում ոչ ոք նման լայնածավալ պատժամիջոցներ չի կիրառել այնպիսի խոշոր տնտեսությունների դեմ, ինչպիսին ռուսականն է։
Կարծիքներ