ԱԱԾ-ն հայտնում է գումարի դիմաց կորոնավիրուսի դեմ պատվաստված լինելու կեղծ սերտիֆիկատ տրամադրելու դեպք բացահայտելու մասին

Հայաստանի ազգային անվտանգության ծառայությունը հայտնում է Երևանի պոլիկլինիկաներից մեկի վիրաբույժի կողմից գումարի դիմաց քաղաքացուն կորոնավիրուսի դեմ առաջին դեղաչափով պատվաստված լինելու կեղծ սերտիֆիկատ տրամադրելու դեպք բացահայտելու մասին: 

ՀՀ ազգային անվտանգության ծառայությունը հայտնում է, որ պոլիկլինիկայի վիրաբույժը քաղաքացու հետ պայմանավորվել է նաև ապօրինի վարձատրություն ստանալ պատվաստանյութի երկրորդ չափաբաժինը ներարկվելու և պատվաստված լինելու վերաբերյալ տեղեկատվությունը էլեկտրոնային համակարգ մուտքագրելու համար: Հաղորդագրության համաձայն՝ գումարը ստանալուց անմիջապես հետո, սակայն, նա և նրա հանցակիցները բռնվել և բերման են ենթարկվել ՀՀ ԱԱԾ:

Նշվում է, որ Երևանի քաղաքապետարանի «Թիվ 5 պոլիկլինիկա»-ի վիրաբույժ Ա.Չ-ն ապօրինի գործողությունները իրականացրել է իր մտերիմ Ն.Ն-ի օժանդակությամբ:

Ա.Չ-ն նույն պոլիկլինիկայի բուժքույր Գ.Գ-ին հրահանգել է վավերացնել բովանդակությամբ կեղծ «Covid-19» համավարակի դեմ պատվաստման առաջին չափաբաժինը ստանալու վերաբերյալ սերտիֆիկատը, որը վերջինս կազմել և օգտագործելու նպատակով հանձնել է քաղաքացի Տ.Մ-ին: 

«2021 թվականի օգոստոսի 19-ին ապօրինի վարձատրության գումարը ստանալուց անմիջապես հետո հանցավոր խմբի անդամները բռնվել են ՀՀ ԱԱԾ աշխատակիցների կողմից և բերման ենթարկվել ՀՀ ազգային անվտանգության ծառայություն: Ա.Չ-ի անձնական խուզարկությամբ հայտնաբերվել է ստացված ապօրինի վարձատրության գումարը, իսկ Տ.Մ-ի մոտ հայտնաբերվել է «Covid-19» համավարակի դեմ պատվաստման առաջին չափաբաժինը ստանալու վերաբերյալ կեղծ սերտիֆիկատը»,- ասված է հաղորդագրության մեջ:

Դեպքի առթիվ ՀՀ ազգային անվտանգության ծառայության քննչական դեպարտամենտում հարուցված քրեական գործի շրջանակներում հանցանք կատարելու մեջ անմիջականորեն ծագած կասկածանքի հիման վրա Ա.Չ-ն և Ն.Ն-ն ձերբակալվել են, իսկ Գ.Գ-ի և Տ.Մ-ի նկատմամբ որպես խափանման միջոց է կիրառվել ստորագրություն չհեռանալու մասին: Վերջիններս որպես կասկածյալ տվել են խոստովանական ցուցմունքներ:

Ձեռնարկվում են համալիր միջոցառումներ՝ դեպքի բոլոր հանգամանքները պարզելու ուղղությամբ:

Ազգային անվտանգության ծառայությունը տեղեկացնում է, որ «Covid-19» համավարակի դեմ պատվաստման գործընթացում առկա նույնաբնույթ կոռուպցիոն դրսևորումները բացահայտելու, դրանք իսպառ բացառելու գործելաոճը կրելու է շարունակական բնույթ, այդ կապակցությամբ ցուցաբերելու է առավել անհանդուրժողական մոտեցում և հորդորում է ցուցաբերել իրավահպատակ վարքագիծ՝ նկատի ունենալով նաև այն, որ համավարակի դեմ պատվաստման գործընթացն ուղղված է հենց հիվանդության տարածման կանխարգելմանը:

Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով՝ դատարանի՝ օրինական ուժի մեջ մտած դատավճռով: