Շախմատ՝ հայրենիքի պաշտպանների հետ. մրցեցին ԱԺ պատգամավորներն ու Զինվորի տան հերոսները

Պատերազմների ընթացքում վիրավորում ստացած, Զինվորի տան զինվորների ու 7-րդ գումարման ԱԺ պատգամավորների միջև անցկացվեց շախմատի առաջնություն. պարտություն կրած պատգամավորները խոստովանեցին՝ պատիվ էր պարտվել հերոսին, հաղթողները վստահություն հայտնեցին՝ հայրենիքի պաշտպանի պարտությունը միայն խաղատախտակի վրա է:

Հուլիսի 20-ին Զինվորի տան «Ռոբերտ Աբաջյանի» անվան սրահում անցկացված մրցաշարը կազմակերպվել էր Հայաստանի շախմատի ֆեդերացիայի հետ համատեղ:

Սերգեյ Համբարձումյանը նախքան խաղը լրագրողների հետ զրույցում համեստորեն նշեց, թե պրոֆեսիոնալ խաղացող չէ, սակայն արդյունքում պատերազմի մասնակիցը երկու պարտիաներում էլ պարտության մատնեց մրցակցին ու բացահայտեց հաջողության իր բանաձևը. «Չպետք է քո էմոցիաներով, քայլերով հակառակորդին ցույց տաս, թե ինչ ես մտածում»:

Սերգեյն ավելի պրոֆեսիոնալ խաղացողներից լսել է, որ խաղի ժամանակ պետք չէ կենտրոնանալ զուտ խաղի վրա, մտածել է պետք ամեն ինչի մասին: «Շախմատը կռվի դաշտ է, որտեղ ամեն ինչը կրկին կախված է քո քայլերից, զգում ես քեզ ինչպես հրամանատար: Այսինքն՝ քո որոշումից կախված է քո զինվորի կյանքը: Ես ուզած-չուզած մտածում եմ իմ ընկերների ու իմ կյանքի մասին: Ցավոք, փորձս մեծ է»,-ասաց Սերգեյ Համբարձումյանը:

Հարցին՝ ինքն իրեն ավելի շատ շախմատի խաղատախտակի մո՞տ է վստահ զգում, թե՞ պատերազմի դաշտում, նա պատասխանեց՝ պատերազմի: «Քանի որ կռվի դաշտում ինձ չեմ զգում հրամանատար, այսինքն՝ չեմ ղեկավարում զորք: Ինձ ավելի հեշտ էր այնտեղ, ես հրաման էի կատարում, ամենաշատը, որ կարող էի անել, հրամանին չենթարկվելն էր: Իսկ այստեղ պետք է դու լինես հրամանատար, ինքդ որոշես քո զինվորի կյանքը»,- ասաց նա:

Սերգեյը կոմայից հետո հիշողությունը որոշ չափով կորցրել է, սակայն նշեց՝ կռվել է Ջաբրայիլում, վիրավորում է ստացել հոկտեմբերի 30-ին «Բայրաքթարից», մեքենայում եղած 25 հոգուց միայն ինքն ու ևս մեկ հոգի են հրաշքով ողջ մնացել: «Ունեմ թոքերի երեք վնասվածք, բեկորներ գլխում, ոտքերի խնդիրներ»,- ասաց նա ու ցույց տվեց նաև վիրավոր թևը:

Սակայն Սերգեյը նշում է՝ հոգեբանորեն ավելի ծանր վիճակում է եղել, քան ֆիզիկապես: «Հավատացեք, այս ամենն անցողիկ է (նկատի ունի իր վնասվածքները-խմբ.), բայց այն, ինչ տեսնում ես այնտեղ, չի մոռացվում»,- նշեց նա:

Սերգեյի առաջնային նպատակն առողջությունն է, ուզում է քայլել, հիմա մեծ դժվարությամբ է քայլում: Հայրենիքի պաշտպանի հաջորդը նպատակն է ՊԵԿ-ում աշխատանքի անցնելը: «Առաջարկ ստացել եմ, բայց առողջական խնդրի պատճառով հրաժարվել եմ: Կսպասեմ մի որոշ ժամանակ, հետո երբ կազդուրվեմ, աշխատանքի կընդունվեմ»,- ասաց Սերգեյը:

Լաերտ Սաղաթելյանը երկու շախմատային պարտիաներում էլ պարտության մատնեց 7-րդ գումարման ԱԺ պատգամավոր Բաբկեն Թունյանին: Թունյանը խոստովանեց՝ Լաերտը շատ ուժեղ մրցակից էր: «Ուժերի ամբողջ լարումով խաղացի և հերոսաբար պարտվեցի»,-նշեց պատգամավորը:

Պատգամավոր, Երևանի շախմատի ֆեդերացիայի նախագահ Մխիթար Հայրապետյանն էլ առաջին պարտիայում պարտվեց Եղիշե Ավագյանին, հիշեց՝ սա արդեն երկրորդ տարին է, որ պարտվում է Եղիշեին, խոստովանեց՝ հատուկ էր պատրաստվել խաղին, սակայն իրեն ոչինչ չօգնեց: Այնուամենայնիվ, Հայրապետյանին հաջողվեց երկրորդ պարտիայում հաջողության հասնել:

Հայրապետյանը հիշեցրեց, որ արդեն երկրորդ տարին է, ինչ Զինվորի տան հետ համատեղ Շախմատի ֆեդերացիան նման միջոցառում է անցկացնում: «Արդեն իսկ կարող ենք ասել, որ բարի ավանդույթ է դարձել: Ֆեդերացիան սրանով նախ շախմատի մասսայականացման քաղաքականություն է իրականացնում, մեր նպատակն է, որ ՀՀ-ում շախմատը լինի ավելի ու ավելի հանրահայտ, և բոլորը խաղան, և երկրորդը՝ այս կերպ փորձում ենք նախ փոխել պատերազմների ժամանակ վիրավորում ստացած մեր հերոս եղբայրների առօրյան, հետաքրքրությամբ լցնել, ինչու ոչ, նաև բացահայտել տաղանդների»,- ասաց ֆեդերացիայի նախագահն ու վստահեցրեց, որ նրանց մեջ շատ լուրջ շախմատիստներ կան:

ԵՊԲՀ ռեկտոր Արմեն Մուրադյանին առաջին պարտիայում հաղթած Ավետիս Զարգարյանը խոստովանեց՝ հեշտ չէր Մուրադյանին հաղթելը: Մուրադյանն էլ հավելեց. «Ավետիսը հանգիստ և համբերատար կարողացավ առաջին հերթին ժամանակը սպառել շատ գեղեցիկ կերպով, հետո՝ հնարավորինս տեղադրեց ֆիգուրները դաշտում այնպես, որ ես չկարողացա կենտրոնանալ մի ուղղության վրա, երկու ուղղության վրա գրոհելով՝ կարողացավ և´ ժամանակի տեսանկյունից, և´ խաղաքարերի տեսանկյունից առավելության հասնել: Ընդունեցի պարտությունը և շնորհավորեցի Ավետիսին: Ավետիսի հետ երկար տարիներ է, որ արդեն ընկերներ ենք, բայց սպորտը միշտ հարգում է հաղթողներին, այնպես որ հերոսին պարտվելը, այս պարագայում, պատիվ էր ինձ համար»,- ասաց Մուրադյանը:

Երկրորդ պարտիայում, սակայն Մուրադյանը կարողացավ հաջողության հասնել՝ հավասարեցնելով հաշիվը: Ռեկտորը նկատեց՝ բարի ավանդույթ է դարձել Զինվորի տանը շախմատի առաջնություն կազմակերպելը: «Կարծում եմ՝ տղաները բավարարվածություն ունեն, որ ուշադրության կենտրոնում են, նրանց մի մասն էլ կարողացավ հաղթանակ ապահովել»,- նշեց նա:

Պատգամավոր Սերգեյ Բագրատյանը խաղում հաջողության հասավ Պետրոս Ֆենջյանի նկատմամբ, որը պատերազմի օրերին կամավորագրվել և մեկնել էր Քարվաճառ, վիրավորում ստացել հոկտեմբերի 14-ին: Լրագրողների հետ զրույցում Պետրոսյան անկեղծացավ. «Պատերազմից հետո ինձ ավելի լավ եմ ճանաչում, կարծում եմ, որ իմ հնարավորություններն ավելի լավ կկարողանամ օգտագործել»:

Բագրատյանն էլ նշեց՝ պատիվ էր հայրենիքի պաշտպանի հետ խաղալը՝ հավելելով, որ Պետրոսը շատ հետաքրքիր խաղաոճ ունի: «Վստահ եմ, որ ինքը միշտ հաղթելու է: Այսօր այս փոքրիկ պարտությունն ընդամենը խաղատախտակի վրա է, բայց իր անցած ճանապարհի շնորհիվ միշտ ինքն է հաղթելու»,- նշեց պատգամավորը: