28-ամյա երևանցին Գյումրու տարբեր փողոցներում թմրանյութով լցված հարյուրից ավելի փաթեթ է տեղադրել

Հունվարի 20-ին ոստիկանության Մուշի բաժնի քրեական հետախույզները ապօրինի թմրանյութ պահելու, պատրաստելու և իրացնելու կասկածանքով Գյումրիի Թեհլերյան փողոցում ձերբակալել և բաժին են տեղափոխել մայրաքաղաքի 28-ամյա մի բնակչի, իսկ նրա վարած «Ֆորդ» մակնիշի մեքենան՝ տարել բաժնի պահպանվող հատուկ տարածք:

Երիտասարդի խուզարկությամբ հայտնաբերվել է մուգ շագանակագույն զանգվածով պոլիէթիլենային 2 տոպրակ, յուրաքանչյուրում՝ 10 փաթեթ:

Ձերբակալվածի հայտնածով՝ այն հաշիշ տեսակի թմրանյութ է, որը ձեռք է բերել տելեգրամյան ալիքներից մեկով և պետք է տեղադրեր Գյումրիի տարբեր թաղամասերում:

Նա հայտնել է նաև, որ ձերբալակման օրը մարիխուանայով լցված 5 փաթեթ տեղադրել է Գյումրիի Թեհլերյան փողոցում:

Նույն օրը Շիրակի մարզի քննչական վարչությունում նախաձեռնված քրեական վարույթի շրջանակներում Թեհլերյան փողոցի տարբեր վայրերում ձերբակալվածը ցույց է տվել տեղադրած 5 փաթեթը։

Բացի այդ, Լալայան փողոցում ցույց է տվել այն վայրը, որտեղից պետք է վերցներ մարիխուանայով 20 փաթեթ, Հացիկ գյուղի ճանապարհից՝ 30 փաթեթ, որոնք պետք է տեղադրեր տարբեր վայրերում:

Քրեական վարույթի շրջանակներում խուզարկվել է նաև երիտասարդի ավտոմեքենան. սրահից հայտնաբերվել է 56 փաթեթ՝ մարիխուանայի նմանվող զանգվածով:

Նախաքննությունը շարունակվում է: