Չորս-հինգ դատավոր զբաղված է Քոչարյանի համար աշխատանք տանելով. Սեդա Սաֆարյան

 2 մլրդ  դրամ գրավի դիմաց Մարտի 1-ի գործով ամբաստանյալ երկրորդ   նախագահ Ռոբերտ Քոչարյանին կալանքից ազատ արձակելու որոշումը տուժողների իրավահաճորդների փաստաբան Սեդա Սաֆարյանը խայտառակություն է համարում:

Նա իրեն չի ներում,  որ  բացարկ  չի հայտնել:  Փաստաբանի  խոսքով՝ դատավորն այդ գործում անկողմնակալ չէ:

«Բոլորս գիտենք, որ Վերաքննիչ  դատարանում  որոշ  դատավորներ բացառապես զբաղված են Քոչարյանի համար աշխատանքներ տանելով՝ գործերը ծռմռելով: Ծռմռելու մեջ նաև տեսնում եմ նրա դերը: Պատկերացրեք՝ զարմացած եմ ուղղակի, որ ամբողջ ժողովուրդը, երբ նայել է դատական նիստի ուղղիղ հեռարձակումը՝ տեսնելով դատավորի պահվածքը այսպես  է բնորոշել.  ոնց որ  դատական նիստը Քոչարյանի երրորդ տղան վարեր: Դա նշանակում է,  որ կողմնակի դիտորդի  մեջ էլ կասկածի տակ է դրված եղել դատավորի անաչառ լինելու հանգամանքը: Այն հանրահայտ փաստերը, որոնք ապացուցման կարիք չունեն դատավորը դիտավորյալ դրանք ապացուցելուն ուղղված պահանջներ էր ներկայացնում պաշտպանական  կողմին: Ցավալին այն է, որ այս պայմաններում մեղադրանքի կողմին՝ դատախազությանն առաջարկեցի բացարկ հայտնել:  Բայց պահը բաց թողնվեց՝ ակնկալում էինք, որ նմանատիպ օգնություն դատավորը ցույց կտա Քոչարյանին և ցույց տվեց»,- FreeNews-ին ասաց փաստաբանը:

Նրա խոսքով՝  դատական ակտը հիմնավոր և պատճառաբանված չէր:

«Հենց առաջին ատյանի դատարանում  Քոչարյանը  հայտարարեց, որ քրեակատարողական հիմնարկի աշխատողին  իր հիվանդասենյակից դուրս է հանել, որովհետև վերջինս լսում  էր իր ու բժշկի զրույցը: Այդ մարդը, որը կարողանում է ծառայություն կատարող մարդուն հարկադրել, որ իր աշխատանքը չկատարի և դուրս է հանում, այդ անձը չի կարող չազդել դատավարության ընթացքի վրա և չի կարող գործողություններ չձեռնարկել, որոնք  կարող են այդ գործի ձախողման համար  դեր ունենալ»,- նշեց նա:

 Սեդա Սաֆարյանը չի կասկածում, որ Քոչարյանը կվճարի   գրավի այդքան մեծ գումարը:

 «Բայց Ռոբերտ Քոչարյանին ի՞նչ է եղել, որ այդ գումարը չվճարի: Հատորներում հրապարակման ենթակա նյութ կա: Այդ ունեցվածքը , որ նրա տղաներն ու աղջիկն ունեն... Այդ ունենցածքը նա երեխաների անունով է գրանցել: Բազմաթիվ մեծ կառույցների մեջ երեք երեխաները  30-40 տոկոսով համասեփականատեր են ու դրա կապակցությամբ բազմաթիվ  փաստաթղթեր  կան՝ 4 էջանոց ունեցվածքի ցուցակ կա: Աշխարհը գիտի, որ Քոչարյանները մեծ ունեցվածքի տեր են »,- նկատեց Մարտի 1-ի գործով տուժողների իրավահաջորդների փաստաբանը:

Սեդա Սաֆարյանը նշեց, որ ՍԴ-ը պետք է վաղուց ցրած լինեին, Վերաքննիչ դատարանն էլ հետը, որպեսզի  հասկանայինք, որ դատարանը բացառապես զբաղվելու է իր գործով:

«Երբ կան  դատավորները, որոնք  ամուր  կանգնած են և թիկունք են երկրորդ նախագահին. բոլորս գիտենք այդ մարդկանց անունները: Երբ կա այդտեղ դատավոր, որ մի մարդու գործառույթային անձեռնխելիությունն է պաշտպանում, որը  բանակը, զորքը, ոստիկանությունը, դիպուկահարին, զինված խմբերին  հանեց ժողովրդի  դեմ : Այդ տրամաբանության մեջ աշխատող դատավորից ի՞նչ պետք է սպասել:  Այնտեղ այնպիսի դատավորներ կան, որոնք Քոչարյանի գործով բացառապես  անելու  են այն, ինչ արել  են Նիկողոոյանը, Ազարյանը: Այո, կան 4-5 դատավորներ, որոնք համախմբված  գործողություններ են անում»,- նշեց նա:

Տիկին Սաֆարյանը  այսպես ամփոփեց  խոսքը՝ մինչև  դատական համակարգը չմաքրվի, հույս  չպետք է ունենանք, որ դատական որևէ գործընթաց կարող է օրինականության դաշտում ընթանալ :