Վաշինգտոնը վերականգնեց Թեհրանի դեմ բոլոր պատժամիջոցները

Ամերիկայի Ձայն

ԱՄՆ-ը վերականգնում է Իրանի դեմ ՄԱԿ-ի բոլոր պատժամիջոցները, ներառյալ զենքի էմբարգոն, ասված է շաբաթ երեկոյան ԱՄՆ պետքարտուղար Մայք Պոմպեոյի արած հայտարարության մեջ

Հայտարարության մեջ նշելով, որ Իրանը ահաբեկչության և հակասեմականության աշխարհի առաջատար հովանավորն է` պետքարտուղարն ընդգծել է, որ պատժամիջոցները ուժի մեջ են մտնում շաբաթ օրվա երեկոյան ժամը 20:00-ից՝ Իրանի միջուկային համաձայնագրի մասին ՄԱԿ-ի Անվտանգության խորհրդի 2231 բանաձևում դրույթի միջոցով:

ԱՄՆ դիմեց այս քայլին, քանի որ Իրանը չի կատարել միջուկային համաձայնագրով իր ստանձնած պարտավորությունները, իսկ Անվտանգության խորհուրդը չկարողացավ երկարաձգել ՄԱԿ-ի զենքի էմբարգոն Իրանի դեմ, որը գործում էր արդեն 13 տարի:

Հայտարարության մեջ նաև ասվում է, որ ԱՄՆ-ն ակնկալում է, որ ՄԱԿ-ի անդամ բոլոր երկրները ամբողջությամբ կկատարեն իրենց ստանձնած պարտավորությունները՝ տեղեկացնելով, որ առաջիկա օրերին Վաշինգտոնը կհայտարարի «լրացուցիչ միջոցառումների մասին` ՄԱԿ-ի պատժամիջոցների կիրառումն ուժեղացնելու և խախտողներին պատասխանատվության ենթարկելու վերաբերյալ:

«Իրանական ռեժիմի վրա մեր առավելագույն ճնշման արշավը կշարունակվի այնքան ժամանակ, քանի դեռ Իրանը մեզ հետ համապարփակ համաձայնության չի եկել զենքի տարածման սպառնալիքները վերացնելու հարցում և չի դադարեցրել քաոսի, բռնության և արյունահեղության տարածումը», - ասվում է հայտարարության մեջ:

Իրանի արտաքին գործերի նախարար Մոհամմադ Ջավադ Զարիֆը պատժամիջոցների մասին հայտարարությունից ժամեր առաջ մեղադրել էր ԱՄՆ-ին ագրեսիվ վարքագծի մեջ և կոչ արել միջազգային հանրությանը քայլեր ձեռնարկել այս ուղղությամբ:

Այս շաբաթվա սկզբին Վաշինգտոնում պետքարտուղար Պոմպեոն հանդիպել էր Մեծ Բրիտանիայի արտաքին գործերի նախարար Դոմինիկ Ռաաբի հետ: Չորեքշաբթի օրը կայացած համատեղ մամլո ասուլիսի ժամանակ Պոմպեոն տեղեկացրել էր պատժամիջոցների վերականգման մասին՝ հաջորդ շաբաթվանից սպառազինությունների արգելքը մշտական դարձնելու համար:

Ռաաբը ի պատասխան համաձայնություն է հայտնել, որ Իրանին երբեք չպետք է թույլ տալ ստեղծելու միջուկային զենք: Այնուամենայնիվ, նա չի պարզաբանել, թե ինչպես է Մեծ Բրիտանիան իրականացնելու պատժամիջոցները:

Օգոստոսին Մեծ Բրիտանիան, Ֆրանսիան և Գերմանիան դեմ են հանդես եկել Իրանի դեմ ՄԱԿ-ի պատժամիջոցների վերականգնման ԱՄՆ-ի նախաձեռնությանը` ասելով, որ դա անհամատեղելի է Իրանի միջուկային գործարքին աջակցելու ջանքերի հետ: