Բոլոր հնարավոր միջոցներով պետք է ձգտենք խաղաղության. Նիկոլ Փաշինյան

Հայաստանը, որդեգրելով խաղաղության օրակարգը, հասկանում է, որ դա միայն մեկ սուբյեկտից կախված չէ, Ազգային ժողովում այս մասին հայտարարեց վարչապետ Նիկոլ Փաշինյանը։

Նա ասաց, թե այս գործողություններով Ադրբեջանը ուզում է ու տորպեդահարում է խաղաղության օրակարգը, որովհետև, ըստ Փաշինյանի, խաղաղությունն այն միջավայրն է, որտեղ Հայաստանը կարող է զարգանալ մեծ տեմպերով ու խաղաղությունն այն միջավայրն է, որը կարող է ապահովել Հայաստանի ու Լեռնային Ղարաբաղի անվտանգությունը։

Հայաստանի վարչապետն ասաց, թե բոլորն ուզում են խաղաղություն, խնդիրն այն է, որ խաղաղություն ասելով՝ յուրաքանչյուր սուբյեկտ հասկանում է իր պատկերացումները ու խաղաղությունը տեղի չի ունենում այն ժամանակ, երբ պատկերացումները չեն համընկնում կամ հնարավոր չի լինում դրանք մոտեցնել։

«Մենք պետք է բոլոր հնարավոր միջոցներով պաշտպանենք Հայաստանի տարածքային ամբողջականությունը, ինքնիշխանությունն ու անկախությունը, մենք պետք է բոլոր հնարավոր միջոցներով ձգտենք խաղաղության՝ փորձելով մոտեցնել պատկերացումներն ու մենք պետք է բոլոր հնարավոր միջոցներով հնարավորինս արագ ու արդյունավետ  բարեփոխենք մեր բանակն ու Զինված ուժերը՝ ապահովելու համար մեր անվտանգությունը», - հայտարարեց Փաշինյանը։