ՏԿԵՆ պորտֆելն ամբողջությամբ համընկնում է ՄԱԿ ԵՏՀ հոգածության ներքո գտնվող ոլորտների հետ. Տատյանա Մոլչանը՝ Սանոսյանին
ՀՀ ՏԿԵ նախարար Գնել Սանոսյանն ընդունել է ՄԱԿ-ի Եվրոպական տնտեսական հանձնաժողովի (UNECE) գործադիր քարտուղար Տատյանա Մոլչանին:
Այս մասին հայտնում են նախարարությունից:
Սանոսյանը ողջունել է տիկին Մոլչանի այցը Հայաստան և կարևորել ենթակառուցվածքների զարգացման ոլորտում ՄԱԿ-ի Եվրոպական տնտեսական հանձնաժողովի հետ համագործակցությունը։
Տատյանա Մոլչանը շնորհակալություն է հայտնել հանդիպման համար և նշել, որ ՏԿԵ նախարարության պորտֆելն ամբողջությամբ համընկնում է ՄԱԿ ԵՏՀ հոգածության ներքո գտնվող ոլորտների հետ։
Հանդիպման ընթացքում քննարկվել են համատեղ ծրագրերի իրականացման, ինչպես նաև ճանապարհային վթաների վերլուծության նոր համակարգերի ներդրման, տարբեր փորձագիտական խմբերի օժանդակության վերաբերյալ հարցեր: Անդրադարձ է կատարվել էներգետիկ և ենթակառուցվածքների զարգացման ուղղություններով հետագա համագործակցության հնարավորություններին։
Տատյանա Մոլչանը ընդգծել է էներգաարդյունավետ միջոցառումների, արևային էներգիայի զարգացման ուղղությամբ Հայաստանի ունեցած առաջընթացը։
ՏԿԵ նախարարի տեղակալ Արմեն Սիմոնյանը ներկայացրել է տրանսպորտի ոլորտում ՄԱԿ-ի Եվրոպական տնտեսական հանձնաժողովի կողմից մշակված մի քանի կոնվենցիաներին Հայաստանի միանալու գործընթացը։ Նախարար Սանոսյանը շնորհակալություն է հայտնել հատկապես կոնվենցիաների և օրենսդրական կարգավորումների ոլորտում ստացած աջակցության համար։
Անդրադարձ է կատարվել նաև ՀՀ կառավարության մշակված «Խաղաղության խաչմերուկ» ծրագրին, որը ևս ենթակառուցվածքների զարգացման մասով առնչվում է ՏԿԵ նախարարությանը։
Մոլչանը ընդգծել է՝ պատրաստակամ են Հայաստանին աջակցություն ցուցաբերել նաև այդ մասով։
Կարծիքներ