Տնտեսության մի քանի ճյուղերի առաջ պարտավորությունների կատարմանը կառավարությունը կուղղի 904 մլն դրամ

ՀՀ կառավարությունը վերաբաշխում կատարեց 2021 թվականի պետական բյուջեում, որով 904 մլն դրամ կուղղվի նախկինում ստանձնած պարտավորությունների կատարմանը: Էկոնոմիկայի նախարար Վահան Քերոբյանը նշեց, որ այդ գումարից 99 մլն դրամն ուղղվելու է նախորդ տարի աշնանացան ցորենի սուբսիդավորման ծրագրի ներքո ծագած պարտավորությունների մի մասի կատարմանը, 32 մլն դրամ հատկացվելու է տուրիստական ոլորտում ընդգրկված  տրանսպորտային ընկերությունների՝ հակաճգնաժամային 25-րդ միջոցառման ապահովման համար:

«165 մլն դրամ պետք է հատկացվի կոնյակի սպիրտի արտահանման տուրքի փոխհատուցմանը: Այս պահին արդեն 274 մլն դրամ փոխհատուցել ենք: Սա մոտ 4,4 մլն լիտր կոնյակի սպիրտի արտահանման խթանմանն ուղղված ծրագիր էր: 114 մլն դրամ կուղղվի պատերազմական գործողություններին մարդկանց եւ զինծառայողների հետ կապված խնդիրների լուծմանը, և 543 մլն դրամ էլ կուղղվի կորոնավիրուսով հիվանդ մարդկանց բուժումը, խնամքը ապահովելուն»,- ասաց նախարարը՝ ավելացնելով, որ սա դեկտեմբեր, հունվար և փետրվար ամիսների պարտավորությունների կատարման ապահովման համար է:

Վարչապետ Նիկոլ Փաշինյանը հետաքրքրվեց՝ արդյոք կոնյակի սպիրտի այդ ծավալներն արդեն արտահանվել են ու հիմա տուրքի փոխհատուցում  է իրականացվում: Նախարարը դրական պատասխան տվեց: «Այո, սա նախորդ տարվա արտահանվածի տուրքի փոխհատուցումն է: Այս տարվա համար 900 մլն դրամ ենք հատկացրել, որը 9 մլն լիտր սպիրտի արտահանման խթանմանն ուղղված ծրագիր է: Սա նաև շղթայական էֆեկտ ունի մինչեւ խաղողագործություն եւ գյուղատնտեսության զարգացում»,- ասաց նա՝ ավելացնելով, որ արդեն քանի տարի խաղողագործները ճանապարհ չեն փակում՝ որպես բողոքի արտահայտում, խաղողը չեն թափում:

Քերոբյանի խոսքով՝ հաշվի առնելով անցած տարվա խիստ ծանր վիճակը կոնյակի ու գինու արտահանման հարցում, այդ երկու կատեգորիաներում ունենք էական անկում: «Կոնյակի սպիրտի այս ծրագիրը հույժ կարևոր է եղել, որ կարողանանք մթերման ամբողջականությունն ապահովել ու չթողնել, որ գյուղատնտեսները լուրջ խնդիրների առջև կանգնեն»,- ասաց նախարարը: