2022-ին շարունակվելու է ԵՄ-ի հետ համագործակցությունը տարբեր ուղղություններով

ՀՀ ԱԺ եվրոպական ինտեգրման ու ֆինանսավարկային և բյուջետային հարցերի մշտական հանձնաժողովների համատեղ նիստում նոյեմբերի 4-ին քննարկվել են «ՀՀ 2022 թ. պետական բյուջեի մասին» օրենքի նախագծում նախատեսված եվրոպական ինտեգրման գծով ֆինանսական հատկացումները:

ԵՄ-ի հետ համագործակցության ֆինանսական բաղադրիչները ներկայացրել է ՀՀ ֆինանսների նախարար Տիգրան Խաչատրյանը: Նա տեղեկացրել է, որ պետական բյուջեի նախագծում ներառված է 11 ծրագիր՝ 54 միջոցառում: Կան նաև 7 ենթավարկային միջոցառումներ՝ երեք ծրագրերի ներքո: Ըստ նախարարի՝ այս մասով նախատեսվել է 81 մլրդ 173 մլն դրամ: Ֆինանսավորումը 2021-ի հաստատված բյուջեի նկատմամբ ավելի է 12 մլրդ 553 մլն դրամով կամ 18,3 տոկոսով: Տիգրան Խաչատրյանը նշել է, որ հատկացումներից 32 մլրդ 976 մլն դրամը վարկային ծրագրեր են, իսկ 15 մլրդ 303 մլն դրամը՝ դրամաշնորհային:

Ֆինանսների նախարարն անդրադարձել է նաև ԵՄ-ի կողմից 2,6 մլրդ եվրո մեծածավալ ֆինանսական աջակցությանը, որով նախատեսվում է ֆինանսավորել մի շարք այլ ոլորտներ ու բյուջետային ծրագրեր: