Կառավարությունը միկրոձեռնարկատիրության հարկման համակարգում նոր կանոններ է առաջարկում

Կառավարությունը միկրոձեռնարկատիրության հարկման համակարգում նոր կանոններ է առաջարկում

Կառավարությունն առաջարկում է հնարավորինս կրճատել միկրոձեռնարկատիրության հարկման համակարգում գործունեություն իրականացնող տնտեսավարող սուբյեկտների շրջանակը՝ դրանով հարկման այս արտոնյալ համակարգը դարձնել էլ ավելի թիրախային:

«Արմենպրես»-ի հաղորդմամբ այս մասին խորհրդարանի տնտեսական հարցերի մշտական հանձնաժողովի նիստում ասել է ֆինանսների նախարարի տեղակալ Արման Պողոսյանը՝ ներկայացնելով «ՀՀ հարկային օրենսգրքում փոփոխություններ և լրացումներ կատարելու մասին» և «Ժամանակավոր անաշխատունակության և մայրության նպաստների մասին» օրենքներում փոփոխություններ կատարելու կառավարության օրենսդրական նախաձեռնությունը:

Ըստ Արման Պողոսյանի՝ միկրոձեռնարկատիրության մասով սահմանված հարկային կարգավորումների գործնական կիրառության ընթացքում պարզվել է, որ համակարգից օգտվում են ոչ միայն բնակչությանը ծառայություններ մատուցող, բնակչության համար աշխատանքներ կատարող եւ ապրանքներ մատակարարող փոքր տնտեսավարող սուբյեկտները, այլեւ այն տնտեսավարող սուբյեկտները, որոնք եկամուտներ են ստանում այլ տնտեսավարող սուբյեկտներից:

Հիմնական զեկուցողի խոսքով միկրոձեռնարկատիրության համակարգի շրջանակի այսպիսի արհեստական ընդլայնմանը նպաստում է նաեւ այն, որ հարկման այս համակարգի շրջանակում հարկումից ազատված են ոչ միայն ձեռնարկատիրական եկամուտները, այլեւ պասիվ եկամուտները, իսկ ֆիզիկական անձանց վճարվող աշխատավարձից եկամտային հարկը հաշվարկվում է ամսական ընդամենը 5 հազար դրամի չափով՝ անկախ վճարվող աշխատավարձի մեծությունից: Կառավարությունն առաջարկում է աշխատավարձ տեսակի եկամուտների հարկման համար ձեւավորել հավասար, արդար կանոններ. միկրոձեռնարկատիրության սուբյեկտներն իրենց վարձու աշխատողների համար եկամտային հարկը կհաշվարկեն համակարգերում գործող մյուս գործատուների համար սահմանված կանոններով: Առաջարկվել է նաև սահմանել, որ պասիվ եկամուտներ ստացողները չեն կարող լինել միկրոձեռնարկատիրության հարկման արտոնյալ համակարգում:

Նախագծերը ստացել են հանձնաժողովի դրական եզրակացությունը: