Իրանը ռուս–ուկրաինական պատերազմից առաջ Ռուսաստանին անօդաչուներ է մատակարարել. Աբդոլլահիան

Իրանն առաջին անգամ հաստատել է, որ Ռուսաստանին մատակարարել է անօդաչու թռչող սարքեր։

Այս մասին ասել է Իրանի արտաքին գործերի նախարար Հոսեյն Ամիր Աբդոլլահիանը, որի խոսքերը փոխանցում է Reuters գործակալությունը։ 

Ըստ ԱԳ նախարարի՝ Թեհրանը Մոսկվային մատակարարել է «քիչ քանակով անօդաչուներ», իսկ մատակարարումն իրականացվել է ռուս–ուկրաինական պատերազմից մի քանի ամիս առաջ։ 

Աբդոլլահիանը նաև ընդգծել է, որ Իրանը իրեն չի համարում Ուկրաինայում հակամարտության կողմ և որ եթե Թեհրանին ներկայացվեն պատերազմում իրանական ԱԹՍ-ների կիրառման ապացույցներ, երկիրը «անտարբեր չի մնա» և կներկայացնի դրանք:

Իրանի իշխանությունները նախկինում հերքել են այդ գործարքի մասին հայտարարությունները՝ չնայած այն հանգամանքին, որ Ուկրաինայի ԶՈւ-ն բազմիցս հայտնել է իրանական արտադրության անօդաչուների ոչնչացման մասին։