Հնդկաստանում գրանցվել է COVID-19-ից մահերի նոր ռեկորդային ցուցանիշ

Հնդիկ բժիշկները վերջին 24 ժամվա ընթացքում գրանցել են կորոնավիրուսով վարակման 401,078 նոր դեպք, երկրում համաճարակի ընթացքում վարակվածների ընդհանուր թիվը կազմել է 21,892,676: Այս մասին հայտնել է Հնդկաստանի առողջապահության և ընտանիքի բարեկեցության հարցերով նախարարությունը։

Հնդկաստանում առաջին անգամ կորոնավիրուսային վարակի հետ կապված մահացությունների թիվը 24 ժամվա ընթացքում գերազանցել է 4 հազարը: Մահացության նախորդ ռեկորդը գրանցվել էր մայիսի 6-ին (3980):

Անցած օրը Հնդկաստանը չորրորդ անգամ գրանցեց 24 ժամվա ընթացքում վարակման ավելի քան 400 հազար դեպք: Ապրիլի 22-ից երկրում ամեն օր անընդհատ գրանցվում է վարակման ավելի քան 300 հազար դեպք: Մինչ մարտի սկիզբը Հնդկաստանը գրանցում էր օրական 20 հազարից պակաս դեպք։

Առողջապահության նախարարության տվյալներով ՝ վերջին 24 ժամվա ընթացքում Հնդկաստանում կորոնավիրուսային վարակի դեմ պատվաստվել է 2 297 257 մարդ, պատվաստված քաղաքացիների ընդհանուր թիվը կազմում է 167 346 544:

Համաճարակային ամենաբարդ իրավիճակը Մահարաշտայի նահանգում է։ Նահանգային կառավարությունը հայտարարել է, որ սկսում է նախապատրաստել մասնագիտացված կենտրոններ երեխաների համար՝ կորոնավիրուսային վարակի բուժման համար: Այս որոշումը բացատրվում է այն փաստով, որ չկա պատվաստանյութ, որը կարող է տրվել երեխաներին։