Լեռնային Ղարաբաղի հակամարտությունը կարգավորված չէ, հրադադարի ռեժիմը չի պահպանվում․ ԵԽ պատգամավորի կոշտ արձագանքը Բաքվին

Ֆրանսիայից Եվրախորհրդարանի պատգամավոր, Արտաքին հարաբերությունների հանձնաժողովի անվտանգության եւ պաշտպանության ենթահանձնաժողովի նախագահ Նատալի Լուիզոն կտրուկ արձագանքել է Ադրբեջանի դեսպան Ռահման Մուստաֆաեւի թվիթին, ով հրապարակել էր Իլհամ Ալիեւի հայտարարությունն այն մասին, որ Բաքուն ԵԱՀԿ Մինսկի խմբին «թույլ չի տա» զբաղվելու ղարաբաղյան հակամարտության կարգավորմամբ, գրում է news.am-ը:

«Պարոն դեսպան, դիվանագիտությունն առաջին հերթին կայանում է այն երկրի նկատմամբ հարգանքի մեջ, որտեղ պատիվ ունես ծառայել: Ֆրանսիան Մինսկի խմբի համանախագահն է, եւ դուք ձեւացնում եք, թե հրաժարվում եք դրանից։ Լեռնային Ղարաբաղի հակամարտությունը կարգավորված չէ, հրադադարի ռեժիմը չի պահպանվում: Երեկ 3 հայ է մահացել»,- գրել է նա։