Լոս Անջելեսի անտառային հրդեհների զոհերի թիվը հասել է 6-ի. ուժգին քամին թույլ չի տալիս օդային օգնություն

Առնվազն վեց մարդ է զոհվել ԱՄՆ-ի Լոս Անջելեսի շրջանում բռնկված հրդեհների հետևանքով, հայտնում է CNN-ը՝ հղում անելով տեղական իշխանություններին։

Նախկինում ցուցակում ընդգրկված էր հինգ զոհ: Մալիբուի քաղաքապետ Դագ Սմիթը հայտնել է ևս մեկ մահվան մասին:

Լոս Անջելեսի շրջանի հրշեջների ղեկավար Էնթոնի Մարոնեն մամուլի ասուլիսի ժամանակ ասել է, որ միայն խոշորագույն հրդեհը ոչնչացրել է առնվազն 4000 շինություն։ Այս հրդեհի տեղայնացումը մնում է զրոյական։ Վարչաշրջանի ադմինիստրատոր Քեթրին Բարգերը հայտնել է, որ 20 մարդ ձերբակալվել է հրդեհների ժամանակ թալան կազմակերպելու մեղադրանքով:

Վարչաշրջանի շերիֆ Ռոբերտ Լունան հայտարարել է, որ պաշտոնապես դիմել է Կալիֆորնիայի ազգային գվարդիայի օգնությանը՝ հրդեհների դեմ պայքարելու համար:

«Ցավոք սրտի, կարծում եմ, որ զոհերի թիվը կավելանա: Հուսով եմ, որ սխալվում եմ: Բայց կարծում եմ, որ այն կավելանա», - ասել է Լունան:

Վերջին տվյալներով՝ թաղամասի 180 հազար բնակչի համար գործում են պարտադիր տարհանման հրամաններ։

Էնթոնի Մորոնեն նախկինում խոստովանել է, որ ռեսուրսները նախատեսված են մեկ կամ երկու խոշոր հրդեհների դեմ պայքարելու համար, բայց ոչ՝ միանգամից չորս: Իրավիճակը բարդացնում էր ուժեղ քամին, որը ժամանակավորապես դադարեցրել է օդային օգնությունը, իսկ Պալիսադեսի տարածքում հրդեհային հիդրանտները չեն աշխատել:

Հրդեհներն արդեն անվանվել են Լոս Անջելեսի շրջանի պատմության ամենաավերիչներից: