Դիարբեքիրի ավիաբազայում 2 պայթյուն է որոտացել

Մայիսի լույս 19-ի գիշերը Թուրքիայի ռազմաօդային ուժերին պատկանող Դիարբեքիրի 8-րդ ավիացիոն ռազմաբազայում 20 րոպե ընդմիջումով 2 պայթյուն է որոտացել: Այս մասին Ermenihaber.am-ի հաղորդմամբ՝ Twitter-ում հաղորդագրություն է հրապարակել Թուրքիայի ներքին գործերի նախարար Սուլեյման Սոյլուն:

Սոյլուի հաղորդմամբ՝ միջադեպերի հետևանքով մարդկային և նյութական կորուստներ չկան:  

Թուրքական տարբեր լրատվամիջոցներ հայտնում են, որ պայթյունները տեղի են ունեցել ոչ թե ռազմաբազայի տարածքում, այլ դրա մերձակայքում: Պայթյունները զգացել են ռազմաբազային հարակից շրջաններում: Դրանց հետևանքով խուճապ է առաջացել տեցի բնակչության մոտ: 

Այս կապակցությամբ նաև հայտարարությամբ է հանդես եկել Թուրքիայի պաշտպանության նախարարությունը: Նշվում է, որ ռազմաբազայի վրա հարձակման փորձերն իրականացվել են փոքր ԱԹՍ-ներով (անօդաչու թռչող սարք):