Մեծամասնության նկատմամբ փոքրամասնության «հաղթանակի» այս խայտառակ արդյունքներով հնարավոր չէ առաջ շարժվել. Բաբաջանյան

Երևանցիների մեծամասնությունը «Հանուն Հանրապետության» կուսակցության նման որոշեց չմասնակցել այս ընտրություններին:

Այս մասին «Ֆեյսբուք»-ի իր էջում գրել է կուսակցության առաջնորդ Արման Բաբաջանյանը՝ նշելով, որ երևանցիների մեծամասնությունը չհամակերպվեց և ակտիվորեն բոյկոտեց, մերժեց առաջարկված «մենյուն»:

«Երևանցիների մեծամասնությունը օտարացած արհամարհեց կեղծ կարգախոսներն ու լոզունգները:

Փոքրամասնության նկատմամբ ցանկացած հաղթանակ պյուռոսյան հաղթանակ է: Մեծամասնության նկատմամբ փոքրամասնության «հաղթանակի» այսպիսի խայտառակ արդյունքներով հնարավոր չէ առաջ շարժվել: Մեծամասնության նկատմամբ տարած փոքրամասնության այս «հաղթանակը» լրջագույն հարված է հասցնում իշխող թիմի հռչակած խաղաղության օրակարգին, որը Հայաստանի համար կենսական կարևորություն ունի:

Այս ընտրություններում ստացած արդյունքներով իշխանությունը ցանկանում էր վստահության քվե ստանալ՝ առաջիկա ակտիվ դիվանագիտական շրջափուլի համար: Ընտրությունների անմխիթար արդյունքները մեծ խնդիր է դառնում նաև այդ ճակատում:

Հայաստանի առջև և երկրի շուրջ շատ ավելի հիմնարար մարտահրավերներ են՝ անվտանգային և արտաքին քաղաքական, որոնք դիմագրավելու համար պետք է հարուցել արտահերթ համապետական ընտրություններ:

Հայաստանի շուրջ հյուսված մարտահրավերները հաղթահարելու համար պետք է փոխվի երկրի ինստիտուցիոնալ ընդդիմության պատկերը:

Իշխանության ընդդիմադիր հատվածի գործունեության ամեն օրն աշխատում է Հայաստանի դեմ, Արցախի դեմ, մեր ապագայի դեմ, երկրի հարատևության դեմ»,-գրել է Բաբաջանյանը: