Իսրայելը դադարեցրել է Գազայի հատված մարդասիրական օգնության մատակարարումը

Հորդանանից մարդասիրական օգնության մատակարարումը Գազայի հատված դադարեցվել է ՀԱՄԱՍ-ի կողմից Քերեմ Շալոմ անցակետի գնդակոծման պատճառով: Այս մասին  թվիթերյան էջում գրել է Իսրայելի ՊՆ COGAT ստորաբաժանումը, տեղեկացնում է «ՌԻԱ Նովոստի» գործակալությունը:

«ՀԱՄԱՍ-ը 3 ականանետային կրակ է արձակել Քերեմ Շալոմ անցակետի վրա, երբ Հորդանանից մարդասիրական օգնության բեռը սպասում էր Գազայի հատված անցնելուն: Արդյունքում, ծրագրված օգնության բարձումը դադարեցվել է», - ասված է հայտարարության մեջ:

Նշվում է, որ վերջին 24 ժամվա ընթացքում նման միջադեպ տեղի է ունենում երկրորդ անգամ: Նախորդ օրը հումանիտար օգնության տեղափոխումը դադարեցվել էր հրետակոծության պատճառով, իսկ իսրայելցի զինվորներից մեկը թեթև վիրավորում էր ստացել:

Պաղեստինցիների և իսրայելցիների միջև անցյալ շաբաթ սկսված բախումների հետևանքով պաղեստինյան կողմում զոհերի թիվը անցել է 220-ը, որոնցից 63-ը երեխա և ավելի քան 34-ը կին, վիրավորվել է մոտ 1500 պաղեստինցի, իսկ իսրայելական կողմում զոհերի թիվը 12-ն է, այդ թվում՝ 2 երեխա։ Վիրավորների թիվը առնվազն 300 է։

Երուսաղեմում հուզումները սկսվել են մայիսի 7-ին: Արաբ երիտասարդների և ոստիկանության միջև բախումները բռնկվել են մայիսի 8-ի երեկոյան, այնուհետև շարունակվել՝ տարածվելով Տաճարի լեռան և Ալ-Աքսա մզկիթի տարածքում: Դրանք իրենց գագաթնակետին հասել են մայիսի 10-ին, երբ հրեաները նշում են Երուսաղեմի օրը: Իսրայելի բանակը հայտարարել Է, որ ոչնչացրել Է ՀԱՄԱՍ-ի հետախուզության առանցքային դեմքերի, այդ թվում՝ ՀԱՄԱՍ-ի ռազմական հետախուզության անվտանգության բաժնի ղեկավարին ու նրա տեղակալին:

Հակառակ սրվող իրավիճակին՝ արդեն 10-րդ օրն է ինչ Իսրայելի և Գազայում իշխող ՀԱՄԱՍ շարժման միջև հրադադարի ռեժիմի հաստատմանն ուղղված դիվանագիտական ջանքերը չեն կարողացել առաջընթաց գրանցել: