Ռաիսին կոչ է արել Ֆրանսիային միջուկային ծրագրի հարցով արդյունավետ բանակցություններ վարել
Ֆրանսիայի և Իրանի նախագահներ Էմանուել Մակրոնը և Էբրահիմ Ռաիսին հեռախոսազրույցի ընթացքում անդրադարձել են Իրանի միջուկային ծրագրի վերականգնման համապարփակ պլանին, որը քննարկվում է «հնգյակի» և ԵՄ-ի հետ։ Հաղորդում է IRNA գործակալությունը։
Մեկուկես ժամ տևած հեռախոսազրույցի ընթացքում կողմերը քննարկել են նաև տարածաշրջանային համագործակցության հարցերը և Covid-19-ի դեմ համատեղ պայքարը։
Էբրահիմ Ռաիսին ևս մեկ անգամ հայտարարել է Իրանի պարտավորությունները կատարելու պատրաստակամության մասին՝ նշելով, որ ՄԱԳԱՏԷ-ն ևս բազմիցս խոսել է Իրանի պատրաստակամության մասին։
Նա շեշտադրել է, որ ԱՄՆ-ն և եվրոպական երկրները խախտում են պարտականությունները ու հավելել է, որ Վիեննայում բանակցությունների ընթացքում Իրանի բանակցային թիմը ձգտելու է պատժամիջոցների չեղարկմանը։
Իրանի կառավարության ղեկավարը Ֆրանսիային կոչ է արել պատժամիջոցների չեղարկմանն ուղղված արդյունավետ բանակցություններ տանել։
Ռաիսին ներկայիս իրավիճակը համարել է ԱՄՆ-ի և եվրոպական երկրների կողմից միջուկային գործարքում պարտավորությունները չկատարելու հետևանք։
Նա նշել է, որ Իրանը լիովին պատրաստ է համագործակցել ՄԱԳԱՏԷ-ի հետ։
Մակրոնը հեռախոսազրույցի ընթացքում Իրանի նախագահին ասել է, որ Ֆրանսիան միջուկային գործարքին ԱՄՆ-ի վերադարձի կողմնակիցն է։
Նա նշել է, որ Ֆրանսիան պատրաստ է շարունակել բանակցությունները հարցի հանգուցալուծման համար։
Իրանի միջուկային ծրագրի համապարփակ պլանի վերականգնման հարցով բանակցությունների յոթերորդ փուլը մեկնարկել է նոյեմբերի 29-ին Վիեննայում։
Կարծիքներ