Ադրբեջանում Իրանին մեղադրել են Հայաստանին աջակցելու, իր երկրի տարածքով զենքի փոխադրում թույլ տալու համար
Թուրքական պետական լրատվական գործակալությունը հրապարակել է Ադրբեջանի Միջազգային հարաբերությունների վերլուծության կենտրոնի (ՄՀՎԿ) աշխատակից Ջավիդ Վալիևի՝ «Ադրբեջանի տարածաշրջանային հարարբերությունները Ղարաբաղյան հաղթանակի տարեդարձին» հոդվածը, որտեղ հեղինակը ներկայացրել է Թուրքիա-Ադրբեջան հարաբերությունները, ուշադրություն հրավիրել տարածաշրջանային զարգացումների հարցում «Իրանի ագրեսիվ դիրքորոշման» վրա։
Հոդվածի հեղինակը դժգոհում է, որ ղարաբաղյան պատերազմի ընթացքում իրանական մամուլում հրապարակվում էին հակաադրբեջանական նյութեր, իսկ Իրանի տարածքով էլ որոշ ժամանակ անց իրականացվել է զենքի մատակարարում Հայաստանին։
Շեշտվում է, թե Իրանի նոր կառավարությունը շարունակում է հակաադրբեջանական քաղաքականություն վարել ու բացահայտ աջակցել Հայաստանին։
«Իրանը, որը Արևմուտքը տարածաշրջան բերող Հայաստանի կառավարության վրա ճնշում գործադրելու փոխարեն նախընտրում է նրա հետ համագործակցությունը խորացնել, ագրեսիվ քաղաքականություն է որդեգրել Ադրբեջան-Թուրքիա զույգի դեմ։ Բնականաբար դա էլ խիստ արձագանք է ստացել Ադրբեջանից։ Ադրբեջանական մամուլը վերջին 30 տարում առաջին անգամ առանց խուսափելու բացահայտ օրակարգ է բերել Հարավային Ադրբեջանի թեման՝ ուղերձ հղելով Իրանին», - նշվել է հոդվածում։
Հիշեցնենք, որ պաշտոնական Իրանը բազմիցս հայտարարել է հայ-ադրբեջանական հարաբերությունների կարգավորման հարցում միջնորդի դերում հանդես գալու պատրաստակամության մասին: Այդ մասին Իրանի ԱԳ նախարարը և այլ պետական պաշտոնյաներ հայտնել են թե՛ Բաքվում, թե՛ երևանում հանդիպումների ժամանակ:
Կարծիքներ