Աբու Դաբիի ռազմատեխնիկական ցուցահանդեսի խնդրով վարչապետը նշանակել է ծառայողական քննություն

Վարչապետ Նիկոլ Փաշինյանը Աբու Դաբիում ռազմատեխնիկական ցուցահանդեսի խնդրով նշանակել է ծառայողական քննություն: Այդ մասին վարչապետը նշեց կառավարության նիստում:

«Տեղյակ եք, որ ռազմատեխնիկական ոլորտի հետ կապված ոչ այնքան հաճելի միջադեպ է տեղի ունեցել, երբ Աբու Դաբիում տեղի ունեցած ռազմատեխնիկական ցուցահանդեսի մեր մասնակցության ձևաչափի ու ցուցանմուշների տեղ հասնելու հետ կապված որոշակի խնդիրներ են առաջացել: Այդ կապակցությամբ նշանակել եմ ծառայողական քննություն և այդ քննության արդյունքներով պատասխանատուներն ի հայտ կբերվեն ու պատասխանատվության կկանչվեն, եթե պարզվի, որ մեր պաշտոնյաները որևէ անելիքի մեջ թերացել են»,-ասաց նա:

Աբու Դաբիում անցկացված «IDEX 2021» (International Defense Conference & Exhibition) ռազմարդյունաբերական 15-րդ միջազգային ցուցահանդեսին Հայաստանի տաղավարում բացակայել են ցուցանմուշները: ՀՀ բարձր տեխնոլոգիական արդյունաբերության նախարարությունը հաղորդագրություն էր տարածել՝ հայտնելով, որ  հայկական ռազմական տեխնիկայի ցուցանմուշներն Աբու Դաբի չեն հասել առաջացած լոգիստիկ խնդիրների հետևանքով: