Ադրբեջանի ԱԳՆ խոսնակն արձագանքել է պաշտոնական Երևանի հայտարարությանը

Ադրբեջանի արտաքին գործերի նախարարությունից արձագանքել են Հայաստանի ԱԳՆ հայտարարությանը՝ նշելով, թե իբր Երևանը փորձում է մոլորեցնել միջազգային հանրությանը:

Երկրի արտաքին քաղաքական գերատեսչության խոսնակ Այխան Հաջիզադեն քանիերորդ անգամ հայտարարել է, թե հայկական կողմը զարգացնում է պաշտպանական ոլորտում գործակցությունը տարբեր երկրների հետ:

Հաջիզադեն չի մոռացել մեղադրել Հայաստանին ռազմականացման և Ադրբեջանի նկատմամբ տարածքային պահանջներ ունենալու համար: 

Ավելի վաղ ՀՀ ԱԳՆ մամուլի խոսնակն անդրադարձել էր Բաքվից հնչող մեղադրանքներին և սպառնալից հայտարարություններին:

Անի Բադալյանը վստահեցրել է՝ պաշտոնական Երևանը բազմիցս և ամենաբարձր մակարդակով հայտարարել է, որ որևէ հարևանի նկատմամբ ագրեսիվ մտադրություններ չունի, ճանաչում է նրանց բոլորի տարածքային ամբողջականությունը և տարածքային պահանջներ չունի։ 

Ինչ վերաբերում է սպառազինություններին, ՄԱԿ կանոնադրությունը յուրաքանչյուր պետության ինքնապաշտպանության իրավունք է վերապահում։ 

ՀՀ ԱԳՆ խոսնակը շեշտել է՝ Հայաստանը սպառազինություն և տեխնիկա ձեռք է բերում միայն ինքնապաշտպանության իրավունքը իրացնելու նպատակով։ «Սրան զուգահեռ՝ Ադրբեջանի հարձակողական զինատեսակներով սպառազինման ծավալներն անգամներով ավելին են, ինչի մասին հաճախ հայտարարում է Ադրբեջանի նախագահը»,- հավելել է Անի Բադալյանը։ Նա կոչ է արել ագրեսիվ հռետորաբանության փոխարեն կենտրոնանալ Խաղաղության պայմանագիր ստորագրելու և մյուս հարցերը շուտափույթ լուծելու վրա։